Lacle: Ningun partido tin permiso ainda pa tene parada diabierna

ORANJESTAD – Ningun partido politico a haya permiso (vergunning) ainda pa tene parada diabierna awor pa entrega lista politico. Asina vocero di polis Lito Lacle a confirma na NoticiaCla awe mainta. Asina e ta desmenti informacion publica den un otro matutino, cu a informa cu partido AVP a haya permiso caba. “Tin 4 partido cu a entrega peticion, y 3 a entrega nan plan” Lacle a sigui bisa. Pero ningun decision a cay ainda. Esey ta sosode awe merdia despues di e reunion 2’or cu tur partido politico. E ora ta haya sa ken tur ta haya permiso of no. Ademas ta trata di solamente e 4 partidonan aki, pasobra e otro 6 partidonan a bisa cu nan no tin marcha.

PERMISO

Segun Lacle, ta importante pa e partidonan cu a haci peticion pa permiso, specifica kico nan idea y plan ta pa e dia ey. Entre otro nan mester bisa nan localidad, nan ora di salida, cuanto hende mas of menos, pa polis por calcula si e informacion ta cuadra cu e plan di entrega lista. Por ehempel ta tene cuenta cu e distancia di e ruta, y cu si segun e ora duna di e partido, si realmente e ta suficiente pa yega na tempo segun e rooster di Conseho Supremo Electoral. Y asina tin mas informacion cu mester sali na cla.

TRAFICO

Pa loke ta trafico, e informacion ey ta bin mas laat den dia awe ora cu e reunion cu e partidonan politico termina. E ora lo informa comunidad con e situacion di trafico lo ta den centro di ciudad.