Retraso di InselAir a pone 20 studiante di Aruba perde avion pa Hulanda

ORANJESTAD – Mientras cu nan a kere cu tur cos tabata cla pa nan ultimo parti di nan biahe pa Hulanda, un grupo di por lo menos 20 studiante di Aruba a bira ‘victima’ di un retraso di e compania InselAir, cu a pone cu nan a perde nan coneccion pa Hulanda. Minister di enseñansa a confirma e situacion fastioso, y a sigura cu Directie Onderwijs y KLM ta haciendo tur posibel pa resolve e situacion. Mayornan cu a acerca NoticiaCla, tabata man na cabez mirando cu nan no tabata haya contacto cu e departamentonan concerni. E preocupacion mas grandi, tabata ken ta bay cubri e gastonan extra, y tambe e schedule tight cu tin na Hulanda e siman aki pa e studiantenan. Esey awor mester wordo reahusta aunke cu e mayornan no a haya e siguransa aki ainda di e departamentonan concerni. Mientrastanto ta trahando riba un solucion riba e asunto, pero no ta conoci ki dia awor e studiantenan aki lo por biaha finalmente pa Hulanda.