Veterano den turismo Raymond Maduro cla pa bira politico activo

ORANJESTAD – Un lansamento proximo di candidato politico cu a hala atencion y sorprende hopi hende, ta esun di e pionero den turismo di Aruba, e veterano Raymond Maduro. Maduro ta e persona clave cu a inicia cu e concepto di time-sharing na Aruba na añanan 70. Su decision pa acepta peticion pa drenta politica, a sorprende hopi hende, mirando cu na e nivel aki, a kere cu Maduro ya lo no ta interesa pa cuminsa un otro capitulo, mirando e trayectoria impresionante cu e tin su tras caba. Pero den un combersacion cu NoticiaCla for di Merca awe mainta, Maduro a confia e portal aki cu e tin basta aña mas pa duna, y esaki ta e momento perfecto pa haci tal. Y ta awe el a duna e lider di e partido blauw POR, e luz berde cu e ta cla pa e reto aki. Mas den siman, Maduro lo comparti kico a conduci na e buelta grandi aki, y con e tin pensa di uza su experticio pa beneficio di politica.