AVP ta concede cambio di lugar di salida y orario pa entrega lista

ORANJESTAD – Tabata cu intervencion di algun instituto di nos pais, cu lider di partido AVP Mike Eman a concede pa cambia lugar di salida y horario di entrega di lista di su partido. Eman a mustra cu pa buena marcha, y despues di consulta cu e institutonan aki, a dicidi cu ta sali diabierna awor for di Cricket Veld envez di Green Square, y ta entrega lista despues cu e ultimo partido haci esaki. Pero pa loke ta e lugar di entrega lista si, den calidad e ora di prome minister, Eman no a concedi y aunke no a duna mucho riba e tema aki, a compronde cu e lugar pa entrega lista ta keda Censo. Cualkier issue rond di esey, tin cu wordo atendi cu e organo nan cu tin nan respectivo trabou den esaki. Cu esaki, e tabata referi e.o. na e trabou cu polis lo tin y CSE cu tin e organisacion di e ‘evento’ mes den nan man. E anuncionan aki Eman a haci como e lider di partido y cierto di nan como prome minister di pais diamars atardi laat for di cas di partido AVP.

PRESION

Eman a uza su palabranan hopi cuidadoso, mirando cu apenas 3 dia prome cu entrega di lista, su partido no kier a tende nada otro cu e loke cu ya nan a palabra y anuncia caba, esta sali di Green Square y entrega lista 3’or, cu ta e ora cu un otro partido caba tabata programa pa entrega nan lista. Aunke cu e lider di partido no a anuncia exactamente e detayes di e combersacionnan teni awe, NoticiaCla a compronde si cu e reunionnan aki tabata instrumental pa cambia di plan. Eman a mustra si, cu e cambionan ta contra di su grupo organizador cu ya a prepara tur cos manera inicialmente planea, pues nan no lo tabata mucho contento. Riba insistencia di NoticiaCla, Eman a concedi cu e horario ‘nobo’ di entrega di lista por ta mei ora despues di e ultimo partido, cu ta poni pa entrega lista 3’or. “Banda di 3’or y mei mi ta calcula cu nos lo entrega e lista e ora” Eman a bisa.