Bucuti & Tara Beach Resort ta firma CAO nobo cu FTA

PALM BEACH - Diahuebs merdia a tuma luga e firmamento di un Contrato Colectivo nobo entre Bucuti & Tara Beach Resort y Federacion di Trahadornan di Aruba (FTA), pa e empleadonan den departamento di Food & Beverage. Ewald Biemans, managing director y doño di e hotel, a firma e contracto cu Hubert Dirksz, presidente di FTA y Tyrone Bremo vice presidente. Di parti di e empleadonan a firma e shop steward Aldrick Pontilius. E contracto ta valido di 2017 pa 2019 y puntonan principal di e CAO nobo ta un ahustacion di salario, aseguro dental y di vista pa famia, y tambe a introduci un bonus inovativo basa riba realizacion di 3 meta pa e departamento cu ta inclui operacion exitoso di Elements Restaurant, Tara Lounge y e store room. Tur partido envolvi a gradici otro pa e negociacionnan productivo. Bucuti & Tara Beach Resort ta orguyoso di por a yega na un CAO pa tres aña mas, unda cu e empleadonan tin garantia di bon beneficionan secundario.