Richardson: No por garantiza seguridad si entrega lista na Censo

ORANJESTAD – Si e sitio di entrega lista diabierna awor, keda Censo, Alto Comisario di polis Dolfi Richardson no por garantisa seguridad pa esnan presente. Asina e hefe maximo di polis a confesa na NoticiaCla dialuna anochi. Un carta cu ela vocifera su preocupacion, e no a haya un contesta ariba ainda. Ademas tin e punto di salida di algun partido pa loke ta e horario di entrega di lista. “E lugar di entrega lista tin cu wordo cambia” Richardson a bisa, parando keto bay riba su punto, faltando 4 dia pa e dia di entrega di lista tuma lugar.

CAMBIO

Segun Richardson, nunca polis no a bay di acuerdo pa Censo bira e lugar pa entrega lista. Pero despues cu e grupo di polis encarga, no a logra convence CSE pa cambia e lugar, a dicidi cu tin cu bay haci lo posibel pa garantisa seguridad pa e evento y esnan eynan. Pero a despues cu a sinta hunto despues y analisa punto pa punto, a bin na e decision cu no ta responsibel pa e sitio keda CSE. Y for di e momento ey a cuminsa haci intento pa cambia e sitio, pero te ainda esey no a logra. Richardson ta para riba cu e final responsabel pa loke pasa, ta e y como tal e no ta haye algo responsabel.

EXPERIENCIA

E experiencia cu Richardson tin di eleccion y entrega di lista, ta pone cu e sa cu cos no ta bay cana manera mester ta. Dificilmente e partidonan lo tene nan mes na regla y horario, pasobra den pasado esey ta loke tempo y experiencia a demostra segun e hefe maximo di polis. “E lugar di Censo no ta apto pa ricibi tanto hende asina” Richardson a bisa. E ta bisa esey, no obstante ta conoci cu a palabra cu ningun hende otro cu e miembronan di partido riba lista, y esun cu e mandato’ so por subi trapi y drenta Stadhuis. Fuera di esey, tin e trafico, comercio y mil persona na un solo sitio cu tur su problemanan cu e ta trece cune.

CARNAVAL

E comparacion cu e situacion lo por bira manera un carnaval, no mester ta un problema pa polis pasobra polis tin hopi bon experiencia pa atende cu carnaval. Pues no ta compronde e ‘big deal’ cu polis ta trece dilanti. Sinembargo segun Richardson, e preparacion y e scenario pa cu carnaval, ta diferente cu e situacion awor. E medida di precaucion durante carnaval ta wordo prepara, y den e caso aki esey no ta asina. E sitio no ta poni cu e preparacion manera cu tempo di carnaval. “Bo no por compara e sitio y situacion cu Carnaval” Richardson a bisa.

GARANTIA

Mirando e situacion, Richardson a reitera un biaha mas, cu tanten cu e lugar keda Censo, e no por garantisa e seguridad di un y tur na e sitio. Ni si tur partido atene nan mes na e regla di rooster (horario stipula) pa entrega lista, Richardson no por garantisa seguridad pasobra simplemente e cos no ta bay cana manera cu mester ta. “E no ta sosode” Richardson ta bisa, di e forma con cos mester bay pero cu no ta bay. “Cos no ta bay manera planea”.

EMAN

E hecho cu prome minister Mike Eman mes ta bin afo y invita pueblo y su partido y seguidornan pa kibra e rooster palabra y insisti cu ta bin entrega lista riba mesun ora cu un otro partido, lamentable. “Ningun hende ta tende cuenta cu e grito di Korpschef. Tur hende ta lubida cu ta e korpschef aki a bisa cu no por. Mi ta contra tur cos cu ta tumando lugar aworaki” Richardson a bisa, refiriendo na e lugar, y e grito pa e partidonan bin na ora cu nan kier. Mester pone e lugar cu tabatin poni manera antes, manera Nikki Beach. Aworaki Richardson kier sugeri lugarnan manera p.e. Cas di Cultura cu e ta sinti ta mas apropia pa e situacion. Te cu dialuna anochi, no a tende di CSE su contesta. Si cambia lugar, no tin un problema y por garantisa seguridad, te unda por. “Pero e ta un lugar cu por contene e situacion y facilita e trabou di cuerpo policial. Mi ta spera cu sano huicio prevalece.