Telearuba y sindicato FTA a haya otro riba fecha pa referendum

ORANJESTAD – Telearuba y sindicato FTA a haya otro dialuna atardi pa cu e asunto di referendum. Esey ta nifica cu ambos partido a bay di acuerdo cu e fecha pa tene e referendum pa reconocemento di e sindicato, cu ta riba 31 di augustus proximo. “E trahadornan a bay di acuerdo cu esaki” Hubert Dirksz, presidente di FTA a bisa NoticiaCla dialuna atardi laat. “Loke si nos ta lamenta ta cu na cierto momento gerencia ta insisti pa haya prueba di formulario di miembrecia yena pa e 14 empleadonan despues cu ya caba nan a ricibi informacion cu nomber y id for di mediador di gobierno” e presidente a sigui bisa. “Maske nos no tin problema en absoluto pa informa esaki, pero e ta mustra un falta di confiansa. Nos opinion ta cu e derecho di trahador pa bira miembro di un sindicato no mester wordo stroba. Nos ta spera cu e negociacionnan por bay den un bon ambiente” Dirksz a finalisa bisando.

AWE MAINTA

Awe mainta ainda e portal aki a raporta cu gerencia di Telearuba no a tene palabra y cu awor sindicato tabata palabrando otro fecha pa tene referendum. Awe mainta sindicato FTA a sinta cu gerencia di e planta di television, pa confirma e loke a keda aproba diabierna ultimo, esta cu den 14 dia, por tene un referendum sin cu e tin cu cana e proceso largo. Pero pa sorpresa di e sindicato, e gerencia a splica NoticiaCla cu gerencia a bisa cu diripiente nan a bruha den fecha y cu mester pone otro fecha. Hubert Dirksz como presidente a splica e portal aki cu a papia enberdad di 14 dia, pero mester ta 14 dia di trabou. “Esey ta hiba nos na 18 di augustus cu ta riba un diabierna. Nos a propone e ora pa e referendum tuma lugar dia 21 of 22 di augustus” Dirksz a bisa. Awor ta wardando contesta di gerencia pa wak si nan ta bay di acuerdo. No ta kita afo cu e trahadornan no kier warda mucho y cu si e fecha wordo aplaza mas ainda, cu esaki por desemboca den un welga di e trahadornan. E fecha mientrastanto a bira 31 di augustus.