Prome grupo di studiante a sali rumbo pa Hulanda awe mainta

ORANJESTAD – E prome grupo di studiante (bursalen) cu a biaha rumbo pa Hulanda a sali awe mainta tempran. E grupo ta uno relativamente chikito cu ta biaha via Corsou y djey subi avion pa Hulanda. Fuera di e grupo aki, tin 2 grupo mas cu lo biaha awe, cu ta e grupo cu ta biaha cu InselAir awe mainta 11’or sigui pa e grupo mas grandi cu ta biaha awe tardi 5:35 cu KLM cu buelo directo pa Hulanda. Na tur tin mas di 200 studiante cu ta dispidi di Aruba (temporalmente) pa busca nan estudio na ‘tera frieu’.

PROBLEMA

E aña aki atrobe cos no a bay sin su problemanan, ora cu recientemente un total di 20 studiante a compronde cu nan no tabata riba buelo pa bay, pa motibonan desconoci. Mayornan desespera a bati alarma y Directie Onderwijs a cuminsa mobilisa pa yuda e grupo di 20 studiante cu a keda ‘sin cupo’. Despues diadomingo un grupo di 8 studiante cu tin cu bay Groningen, a bin tende di nan mentor cu ‘no tin camber pa nan’ y cu nan tin cu prepara un plan B. Esaki a pone e mayornan obviamente altera mirando cu apenas un dia prome nan ta bin tende cu nan yiunan ta bay sin cu tin camber regla pa nan. Despues e mentor(nan) a informa cu tur cos lo wordo regla pa nan toch, pues pa nan no preocupa. Foto cortesia AAA.