Arubahuis cla pa ricibi e studiantenan cu ta bin Hulanda

DEN HAAG - Directora di Arubahuis Shandra John ta informa cu Arubahuis ta cla pa ricibi tur e studiantenan cu ta biniendo Hulanda pa sigui man studio. Particularmente e departamento di Enseñansa di Arubahuis den un cooperacion estrecho cu e mentornan y tur e Plaatselijke Opvangcommissie (POC) ta bon prepara pa ricibi nos studiantenan na yegada na Schiphol.

E percura pa tin transportacion pa tur studiante pa nan ciudad pa aki nan por cuminsa  cu e opvangprograma den nan ciudad. Esaki ta un programa intensivo cu a wordo hinca den otro door di e POC bou coordinacion di e mentor. E grupo mas grandi di studiante lo yega riba diamars 1er di augustus, riba tres vuelo. Un grupo mas chikito lo yega riba un vuelo e dia siguiente, esta diaranson 2 di augustus. Diahuebs dia 3 di augustus lo tin tres studiante cu lo yega Hulanda riba un solo vuelo. Tur tres dia lo bay tin funcionarionan di Arubahuis y mentornan presente na Schiphol pa ricibi y guia e studiantenan aki pa nan ciudad. Si e studiantenan tin algun pregunta ainda nan por tuma contacto libremente cu departamento di Enseñansa di Arubahuis of cu nan mentor.