Telearuba y FTA di acuerdo pa acelera referendum

ORANJESTAD – Dialuna mainta gerencia di Telearuba y sindicato FTA mester ‘formaliza’ un acuerdo cu nan a yega na dje diabierna ultimo. NoticiaCla a compronde for di presidente di sindicato FTA Hubert Dirkz cu a palabra cu lo tene un referendum dentro di 2 siman, cu ta pone esaki pa mitar di augustus proximo. Pero a compronde tambe cu si dialuna cos tranca, y cu opta toch pa alarga e proceso pa 2 luna, no ta descarta accion di parti di e trahadornan. Esaki pasobra trahadornan ta considera cu tin un palabracion haci, y cu si no honra esaki por spera problema.

TRANCA

Dialuna ainda cos tabata tranca ora cu e gerencia di Telearuba y sindicato FTA no a logra haya otro ainda den e reunion e mainta ey riba asuntonan laboral, y a continua diabierna mainta cu esaki. Presidente di e sindicato FTA Hubert Dirksz a mustra dialuna cu e planta di television tabata insisti cu no tin falta di transparencia y cu cos no ta manera cu e sindicato ta bisa. Sindicato ta papia di iregularidad cu ta tumando lugar den e canal, y cu gerencia ta haci dificil pa reconoce e sindicato sin mas. FTA kier reconocemento sin referendum y e gerencia no. Director di e canal Andre Schouten tabata breve pa NoticiaCla informando cu e ta prefera duna un declaracion diabierna ora cu nan caba reuni.

SITUACION

Segun e sindicato, di e 21 trahadornan ‘vast’ cu tin, 18 por bira miembro y di cual 14 a haci tal caba, esta bira miembro. Loke e sindicato kier evita, ta un caminda largo di referendum, pasobra nan ta sinti cu e tempo aki no ta beneficia e trahadornan y cu e gerencia por probecha di e situacion y na final percura pa no tin mester di sindicato mas. Entre otro, lo kier trata na acomoda e trahadornan pa nan inquietudnan, haciendo e innecesario pa tin un sindicato. Pero ora cu cos caba, lo pasa tempo cu consecuencia cu e sindicato na final por keda afo. Esey ta algo cu e presidente kier evita. Unico cos cu mester haci ta laga gerencia acepta e sindicato como representante di e trahadornan y pa nan por cuminsa traha riba e problemanan. Ora cu a check kico ta e ‘irregularidadnan’ cu ta referi na dje, Dirksz a papia di e.o. discriminacion na trabou di funcionnan cu tin, unda cu hendenan cu ta miho prepara, no ta haya cierto trabou pero otronan si, cu menos preparacion pero si miho salario. Cosnan cu e trahadornan no ta di acuerdo cu ne. Segun sindicato, gerencia su abogado ta insisti den e caminda largo, esta via un referendum, cu por tuma por lo menos un luna mas di proceso prome cu ta asina leu.