CSE: Si partido entrega lista fuera di su ora, e ta stroba e otro

ORANJESTAD – Por surgi un situacion otro siman diabierna cu dos partido politico (AVP y RAIZ) por topa otro ora di entrega lista. Esaki pasobra ambos tin intencion di entrega e mesun ora cu ta 3’or di atardi. Partido RAIZ su ora pa entrega lista (segun rooster) ta 3pm. AVP su horario otorga ta 10:30am. Pero AVP riba nan pagina di Facebook a mustra cu nan tambe ta bay entrega lista 3’or, pues e mesun ora cu RAIZ. Conseho Supremo Electoral a bisa di lo ricibi e partidonan segun nan horario, y den e caso aki ta pais RAIZ. Si nan keda cla prome cu 4’or, e proximo partido por entrega su lista, contal cu e tuma lugar prome cu e ora stipula.

SIGURIDAD

Segun presidente di conseho supremo electoral Glenn Thode, si tur partido tene nan mes na nan horario y responsabel, y polis haciendo su trabou, no mester tin problema. Sinembargo e carta di polis entrega pa Alto Comisario di polis ayera, ta papia di ‘riesgonan pa tenele na Censo’. Sinembargo no a specifica e tipo di riesgonan. “Si tin cooperacion di e partidonan y nan liderazgo, si tin cooperacion di esnan cu ta responsabel manera polis y tur cu ta carga autoridad pa esaki , nos no ta mira cu e situacion ta bay ta uno cu e riesgonan aki tuma luar. Nos tin confianza completo den loke polis a afirma na nos na e mesa aki” Thode a bisa.

DOS PARTIDO

Tin un margen structura pa cos cana bunita, pa cual a traha un rooster. A tene cuenta cu distancia entre partido pa nan no topa otro, basa riba nan cantidad di sostenedornan; Esaki segun encuestanan haci. “Nos a organiza esaki segun nos responsabilidad” Thode a bisa. E hecho cu ley ta bisa cu partidonan por entrega entre 9-4 pa entrega lista no kier men cu tur por yega pareu segun Thode. Segun e presidente di CSE, si riba un dia cu tin 10 partido pa entrega lista, nan tuma e libertad y no tene cuenta cu e schedule, y bin riba nan propio horario, nan ta asumi e autoridad y libertad cu CSE tin, y consecuentemente ta ‘crea un situacion’. “Un situacion cu nos no ta responsabel pe” Thode a finaliza bisando. Vice presidente di CSE Hubert Maduro mesora a añadi acerca. “Nos tin poni pa 3’or un partido nobo RAIZ. Si tin un otro partido kier bin na e mesun ora, no tin un otro conclusion cu e otro partido kier bin stroba RAIZ di stroba esun di tres ora. Esey ta un consecuencia cu si e mester ta paden, nos ta wak kico pa haci cune” Maduro a bisa. “Esaki ta partido di gobierno, e no sa haci peticion” Maduro a finaliza bisando.