Arends: Ningun momento AVP a switch cu RAIZ pa entrega lista

ORANJESTAD – Ningun momento partido RAIZ a switch cu partido AVP riba e horario di entrega di lista di partido otro siman. Asina e lider di partido RAIZ, Ursell Arends a bisa NoticiaCla diabierna merdia. De hecho, ningun momento nan a papia cu AVP riba un eventual switch. Segun Arends, ‘cu asombro’ nan a tuma nota di e informacion ey. “ Nos ta bay entrega nos lista conforme cu e ora stipula y notifica na nos cual ta 3'or di atardi, dia 4 di augustus 2017 y ta spera cu e organisacion encarga cu esaki, esta 'hoofdstembureau', tuma nan parti den e proceso na cuenta pa henter e evento aki cana debidamente” Arends a sigui bisa. Diahuebs e portal aki a informa cu tabatin un switch, mirando cu e partido berde AVP a anuncia oficialmente nan cambio di orario di 10:30 pa 3'or. Pues RAIZ ta desmenti esaki awor. 

EHEMPEL

Segun Arends, nan ta kere cu e caso aki ta un ehempel perfecto pa ilustra e necesidad cu nos tin riba e isla aki pa comunica y trata otro cu respet mutuo pa asina mehora e situacion general. “ Pa RAIZ entregamento di lista ta nada mas y nada menos cu un proceso comun den e eleccion, pero mescos cu cualkier proceso electoral, uno cu merece e mesun protocol y profesionalismo cu cualkier otro” Arends a sigui bisa. Como tal “RAIZ a dicidi di comparti e suceso aki pa por duna un bista clave di kico nos movimento ta para p'e”.

AVP

Mientrastanto, e partido AVP cu ta poni pa entrega lista (segun e horario publica pa Conseho Supremo Electoral) 10:30am, a informa riba nan pagina di Facebook cu nan ta entrega nan lista (tambe) pa 3’or di atardi. Nan ta basa nan mes riba e ley cu tin cu ta bisa cu “ partidonan, participando na eleccion, tin cu entrega nan respectivo lista prome cu 4or di atardi”. Esaki kier men cu ningun hende no por stroba nan pa haci e entrega e momento ey, contal cu e ta entre 9’or di mainta y 4’or di atardi. Pa loke ta nan motivacion, ta mustra cu ‘mirando cu partido AVP tin e custumber cu un cantidad grandi. di simpatizante y sostenedornan ta compaña lider di partido y candidatonan pa entrega lista, AVP a scoge e ora di 3'or di atardi pa entrega su lista di candidato. E ora aki ta mescos cu eleccion 2009 y 2013, caminda e partido a entrega su lista despues di merdia. Den un carta oficial, dirigi na conseho supremo electoral, lider di partido Mike Eman a informa di e escogencia di e partido berde.’ Esaki ta nifica cu te cu awor, tin dos partido cu ta entrega lista riba e mesun ora.