Mireille St Jago a sali di MEP tildando partido di discriminacion

ORANJESTAD – Faltando un siman pa e partido geel (MEP) entrega su lista politico, ela perde un di su candidatonan cu a dicidi di ‘per direct’ bandona e partido. Mireille St Jago a informa prensa awe tardi laat cu e no ta forma parti mas di e partido, y ta tilda e partido y su lider di discriminacion y racismo. St Jago a admiti na NoticiaCla cu ela wordo pidi pa concede su posicion (#12) di biaha pasa pa un otro cu por logra mas voto. St Jago no a acepta esaki, y a bisa cu esaki ta prueba cu e partido no tin hende (muher) di color na pecho. Lider di partido MEP Evelyn Wever den su prome reaccion pa e portal aki, a lamenta e decision di St Jago, pero no ta considera esaki como un ‘crisis’ den partido. E ta lamenta tambe cu St Jago a uza e carta di discriminacion ‘pasobra tur hende sa cu mi no ta discrimina’.

TRAYECTORIA CU MEP

ST Jago a splica cu ora cu ela subi lista di MEP 4 aña pasa, su famianan a consehe contra pasobra e no ta e partido corecto. “Mi kier a prove nan wrong" St Jago a bisa. Lamentablemente Wever no a convence di lo contrario y un siman despues cu porfin (a tilda Wever di ta dificil pa haya pa papia cu ne) a sinta cu ne, tabata cla pe cu e partido no ta p'e. A tum'e un siman pa asimila e informacion pa despues awe tardi e anuncia su retiro inmediato di e partido. E ta habri pa cualkier partido, contal cu nan tin e balornan cu e tambe ta kere den dje. Ningun partido a acerc'e ainda segun su palabra na e portal aki.