Trahadornan di Elmar ta menasa cu accion si no reconoce STA

ORANJESTAD – Un grupo grandi di trahadornan di e compania di utilidad Elmar ta menasando cu accion, si gerencia no reconoce sindicato STA (Sindicato di Trahadonan Arubano) como nan sindicato, envez di esun actual UEA (Union Electricista Arubano). Asina presidente di e sindicato Diego de Cuba a confirma na NoticiaCla awe merdia. Segun de Cuba, durante un reunion diaranson anochi ela haya e mandato pa manda e mensahe ey pa e gerencia. Un carta a bay pa e gerencia cu e mensahe ey. E carta ta bisa pa reconoce e sindicato, sin tin cu bay door di e proceso di referendum pasobra esaki ta tuma mucho largo.

E SITUACION

Segun de Cuba, un total di 94 trahado a afilia na e sindicato, di e total di 126 trahadornan, cu ta casi 80% di tur trahado. Ademas, e presidente ta mustra cu na december di aña pasa, 25 trahado di e compania caba a retira di e sindicato UEA. Pues na tur, tin como 102 trahado cu no ta miembro mas di e sindicato anterior. E carta ta pidi mediado di gobierno pa intermedia mesora, no tarda y percura pa e reconocemento tuma lugar, sino e trahadornan ta bay den accion. “E trahadornan ta determina pa bay den accion”, de Cuba a sigui bisa.

REACCION ELMAR

NoticiaCla a tuma contacto cu e gerencia di Elmar sr Robert Henriquez, pero e no kier a reacciona aworaki.”Mi no ta bay reacciona aworaki, danki” Henriquez a bisa brevemente na e portal aki.