DEA: Ainda mester lugar pa 20 studiante biaha pa Hulanda

ORANJESTAD – Pa motibonan ainda desconoci, un total di 20 studiante no a wordo ubica riba avion hunto cu 180 otro cu ta poni pa sali otro siman pa Hulanda. Departamento di Enseñansa Aruba (DEA) seccion Studiefaciliteiten a confirma e fayo cu NoticiaCla a raporta ariba mas prome, despues pa medio di un comunicado. Den e comunicado nan a splica e situacion cu a surgi kico cu e 20 studiantenan, y cu ta trahando pa soluciona e asunto aworaki. Esaki ta nifica cu total di 20 studiante ta bay awor riba otro buelo cu no ta dia 31 di juli manera e otro 180 studiantenan cu ta poni pa sali 5:35 pm rumbo pa Hulanda.

REACCION DI DEA

Segun DEA, ayera anochi (dia 26 di juli) a constata cu no a ricibi for di e agencia di biahe y KLM 20 ticket di 20 studiante. Ta trata aki di 20 studiante cu a cumpli na tempo cu tur rekisito pa por bin na remarca pa un ticket di biahe, y a purba di ubica nan hunto cu e otro 180 studiante biahando dia 31 di juli. Esaki a sosode despues cu DEA ayera atardi a publica un anuncio riba su website y Facebook page cu a caba di ricibi e tickets di biahe pa Hulanda for di e agencia di biahe, y cu e studiantenan cu a cumpli na tempo cu tur rekisito pa por bin na remarca pa un lening reisticket, lo por pasa busca nan ticket. DEA den onderhandeling cu e agencia di biahe, a trata na logra pa e 20 studiantenan aki forma parti di un buelo cu tambe lo tin como fecha di yegada na Amsterdam dia 1 di augustus proximo. Sinembargo e agencia di biahe a informa na DEA cu no tin mas luga. Inmediatamente, ayera anochi ainda, DEA a busca contacto via telefon cu e 20 studiantenan aki pa splica nan di e situacion cu a surgi. Mester remarca cu na e momento ey e seccion no a logra di haya contacto cu 5 di e 20 studiantenan aki. DEA a comunica cu e studiantenan cu lo sigui onderhandel cu e agencia di biahe y lo informa e studiantenan mas pronto cu ta posibel pa ki fecha nan lo tin reserva. E peticion di DEA na e agencia di biahe ta pa acomoda e grupo di 20 studiante aki hunto riba un solo vuelo. Tur cos ta keda sinembargo na e disponibilidad.

LAMENTO

DEA ta lamenta cualkier inconveniencia cu e cambio di fecha aki por causa pa tanto e studiante, su mayornan, e mentoren y POC’s. DEA lo keda den contacto cu tur esnan concerni pa comunica tur informacion necesario.

BIAHE NORMAL

Manera ta custumber, Departamento di Enseñansa Aruba (DEA) ta yuda organisa e biahe aki pa studiantenan por medio di un ticket di biahe. E cantidad di ticket cu ta wordo reserva ta a base di un “schatting” na momento cu resultado di graduacion ta wordo finalisa. Historicamente studiantenan ta bula riba varios fecha segun disponibilidad di cupo riba e buelonan. E foto ta di archivo di NoticiaCla di e biahe di beursalen aña pasa pa Hulanda.