Vomit bag cu palabra ‘bomb’ skirbi, ta causa di melding riba avion

ORANJESTAD – Un ‘vomit bag’ (saco pa hende vomita aden) cu e palabra bomb skirbi ariba haya door di e piloto den baño tabata causa di e alarma di bom awe merdia. Asina vocero di aeropuerto Hendrik Croes a confirma pa NoticiaCla. Dos ora despues cu e avion di Southwest Airlines a yega Aruba riba cual tawata tin un bommelding, aeropuerto Reina Beatrix a habri bek pa trafico aereo. Manera cu NoticiaCla a raporta caba, vocero di aeropuerto Hendrik Croes a confirma cu pa 12:50 pm buelo WN 1630 di Southwest Airlines procedente di Orlando, a aterisa na Aruba. Mesora a pone riba rampa pa por evacua tur pasahero y cuminsa e buskeda pa e supuesto bom. Dos ora despues, pasa di 2’or ainda aeropuerto tabata cera, mientras cu camindanan dirigi pa aeropuerto si a wordo habri. E avion cu mester a bolbe Orlando, mientrastanto a keda cancela. 

E SITUACION

Tabata pa 12:35 di awe merdia cu e co piloto di e buelo di Southwest a yama toren di control cu e mensahe cu tabatin un bom abordo di e avion. Mesora a activa e plan cu tin den caso di menasa di bom. Den e caso aki polis, ministerio publico y tur otro instancia relevante a presenta na aeropuerto. E avion a baha pa 12:50 y keda para riba e rampa. Pasaheronan a wordo baha di e avion y hiba pa porta di salida A/B pa autoridad por a cuminsa cu nan investigacion. A cera aeropuerto pa por a haci esey. Tur maleta a wordo baha y ta wordo controla pa K-9 unit. Asina investigacionnan ta cla aeropuerto por duna tur contesta. Pasaheronan mientrastanto ainda ta sinta trankil sinta na gate A/B. Polis lo entrevista e pasaheronan awo y lo baha e maletanan y pone nan na un area pafo pa wordo controla cu ayudo di K-9

TRAFICO AFECTA

Mirando cu ta un ora ‘peak’, e melding a afecta basta trafico aereo e momento ey. E buelonan di JetBlue 1057, Southwest 1804, American 1038, United 1040, y Delta 484 tur a wordo desvia pa Corsou, mientras cu Aruba Airlines 102, Copa 349, y Jetblue 774 no por a sali for di Aruba ainda. E avion en cuestion mes tabatin 134 pasahero abordo. Foto ta cortesia di Triple A.