Conclusion rapport CFT: Presupuesto no realista y medidanan tuma ta laat

ORANJESTAD – “E presupuesto 2014 no ta nada realistico, y ta mas pio cu Raad van Advies a avisa” ta un di e comentarionan cu e rapport di secretariado di College Financieel Toezicht lo presenta diabierna na gobernador, y cu NoticiaCla.com por a confirma. Manera ta conoci, tin un anticipacion hopi grandi pa e contenido di e rapport, mirando e embergadura cu esaki por tin pa pais Aruba, y mas ainda pa continuacion di gabinete Mike Eman II. Mientras cu e rapport ta keda entrega oficialmente diabierna na gobernador, e contenido mes lo keda ‘secreto’ pa por lo menos tres siman mas segun NoticiaCla.com a wordo informa. Esaki pasobra ‘oficialmente’ gobierno tin cu duna su comentario riba e rapport. Mes momento NoticiaCla.com a haya confirmacion cu e contenido di e rapport ta conoci caba pa conseho di minister, (for di siman pasa) y a cuminsa traha riba e comentarionan caba.

Pa loke ta e contenido, CFT su secretariado a scrutina henter e presupuesto y ta indica varios fayo cometi pa gabinete Mike Eman II, manera e hecho cu e aumento di prima di AZV den forma di un ‘health tax’ ta mucho laat, y cu e deal di APFA ainda no ta cla. Asina tin mas cos cu e comision ta indica di fayonan cu nan a constata y cu mester wordo remedia pa medio di sugerencianan cu gobierno tin cu bay implementa.

Den e proximo 3 simannan, gobierno tin cu bay ‘implementa e cambionan aki sugeri’, pa despues presenta esaki na gobernador atrobe. Unabes cu esaki ta cla, lo dicidi si ta firma e presupuesto y considera esaki como un capitulo sera. Mientrastanto e KB ta keda vigente segun NoticiaCla.com a compronde di su fuentenan. Keda pendiente pa mas informacion diabierna. Foto archivo di CFT durante un conferencia di prensa recien na Corsou.