Dos ruman Arubiano di Hulanda pa Thailandia riba bicicleta

IRAN – E hobennan Arubiano William (24) y Jaillen (34) Laclé awe a cumpli 115 dia biahando riba nan respectivo bicicleta, cu e meta final di yega Thailandia. E odisea a inicia dia 3 di april ultimo cu e meta pa conoce mas tanto hende y cultura entre Den Haag, Hulanda y nan destinacion final. Despues di a pasa door di 8 pais, (Hulanda, Alemania, Austria, Slovenia, Hungria, Serbia, Bulgaria, y Turkia), actualmente nan ta na parti norte di Iran. Cu 9 pais bishita, nan tin 9.643 km cori caba riba nan bicicleta. Ta calcula cu nan mester pasa por lo menos den 5 pais mas prome cu nan yega nan destinacion final.

ORGANISACION

E hobennan ta yiu di e conocido Jaime Lacle, y for di loke por a compronde, nan ta sumamente bon prepara. Via di nan website, nan ta informa cada algun dia di nan odisea, completo cu mapa, foto y compas. Pa un persona sa unda nan ta cada momento, ta hopi facil, ya cu nan ta uzando aparatonan sofistica GPS cu ta brinda e facilidad aki. Y mester bisa cu nan ta hopi transparente, publicando cada uno exactamente kico cada uno tin na material pa bisti, come, y mas. Hopi documenta, nan ta mustra cu nan ta conciente cu e ta un biahe lento, pero sigur educativo cu ta duna nan e chens pa conoce hende, nan cultura y mas. Nan ta conta cu ora cu nan a bin cu e idea, mayoria hende a yama nan pa loco. Pero asina mes nan a dicidi pa tuma e reto y inicia e biahe aki bon documenta aki, y no stop te ora cu nan logra nan meta. Nan a contrae algun contratempo na caminda, pero esaki no a kibra nan. E ultimo tabata un cambio di ruta na Iran, cu a pone cu nan a sufri un tardansa chikito. Inicialmente a opta pa sigui straight den un liña meymey di e pais, pero e temperatura no a duna. A opta e ora pa move pa e parti norte cu tabata mas miho pa nan por a sigui. Pa esnan cu kier sigui e trayectoria di e dos hobennan aki, por haci esaki AKI.