Partidonan a desaproba destruccion di nan material di campaña

ORANJESTAD – Partidonan politico POR y MEP ambos a condena e destruccion contra nan materialnan politico e siman aki. Un rapport oficial di polis, ta describi esunnan di MEP, pero a compronde cu tambe tin di partido POR. Segun polis, chauffeur di un Toyota blanco tabata destruyendo bandera di palonan di bandera na 7 adres na Caya Franse Bloem y Caya Bembe, y ta papia di 11 bandera di MEP ‘cu a keda destrui’. Polis ta bisa tambe cu no a haya e culpabel.

REACCION POLITICO

Tanto lidernan di MEP Evelyn Wever como lider di POR Otmar Oduber a declara contra e acto aki. “Mi ta condena vandalismo cu a wordo haci contra materialnan politico y na casnan di hende, y mi ta lamenta cu esaki a pasa” Wever a bisa.” Ta “keur af” tur atakenan cu ta tuma luga na nivel personal, tur atakenan cu ta tuma luga riba hogar di hende pa loke ta trata bandera, borchi entre otro di cua signatura cu e por ta” Oduber a bisa. “Mi ta haci un apelacion riba tur hende pa ban demostra comportacion civico y demostra respet, sin comete actonan di vandalismo. No solamente e ta un acto castigabel, pero e ta hopi bergonsoso cu un partido no por contene su desesperacion y ta manda su simpatisantenan pa causa destruccion” Wever a sigui bisa. “Mes momento mi ta haci un apelacion tambe na nos simpatisantenan, pa no paga malo cu malo, y no recuri na e mesun vandalismo. “Nos partido a bisa na hopi ocasion cu mientras “they go low, we go high”, pa cual nos a cuminsa e partido aki cu ne. Cu e meta di partido pa informa nos comunidad y ofrece comunidad di Aruba un propuesta di gobernacion nobo y diferente,” lider di POR Otmar Oduber a bisa. “POR ta para pa libertad di por expresa bo opinion, mescos cu bo ta pidi e derecho di cada un persona wordo respeta den e comunidad Arubano. P'esey awe ta pidi partidonan politico y tur simpatisantenan y haci un apelacion pa respeta opinion di cada un persona na Aruba, special den e temporada aki (9 simannan cu falta pa eleccion).” Oduber a finalisa bisando.