Donata: Partido AVP ta participa toch den debate Latino

ORANJESTAD – Partido AVP lo participa ‘after all’ na e debate politico pa Latinonan otro luna. E organisadornan di e debate a confirma na NoticiaCla cu pa un mal comunicacion, nan inicialmente a keda afo. Tabata ora cu NoticiaCla a publica e noticia recientemente cu AVP a keda afo, e partido a haya su mes den un ‘core core’ pa sa unda cos a bay robes, pasobra nan lo ‘no a haya nada’. A resulta cu enberdad e invitacion a bay na adres robes, y cu nunca esnan cu mester a ricibi esaki, a haye. Reconociendo nan eror, e organisadornan a dicidi e ora pa laga e partido y su lider Mike Eman ta participa toch. E evento mientrastanto ta completamente ‘sold out’ segun e organisadornan a bisa, indicando cu tin un interes grandi pa e debate aki.

ERROR

E organisador Sherwin “Win” Donata a splica e portal aki cu ora cu e noticia a keda publica pa e portal aki, mesora a cuminsa ricibi yamada di e partido berde, cu nan no ta compronde pakico nan no ta participa. Y cu nan lo no a haya ningun invitacion. Ora cu a bay trace bek e ruta y proceso, a bin sali na cla cu e sitio unda cu a laga e invitacion, no tabata e sitio corecto y e persona cu lo a ricibi e informacion, no a procede pa sigura pa e invitacion yega toch na e persona corecto. Manera indica, a cuminsa un core core pa wak kico a bay fout y pa sigura toch cu e partido por confirma su participacion. Esaki pasobra segun e reglanan (cu e partido tambe a haya), ta poni claramente cu tin un deadline pa e partidonan tene nan mes na dje. Algo cu na prome instante a resulta no corecto. E debate mes ta poni pa tuma lugar dia 24 di augustus proximo pa 6’or di atardi y ta entre e lidernan politico di e partidonan.