Partido politico ta sigura cu no a purba haci contrabanda cu material

ORANJESTAD – 'No ta berdad cu nos material politico di promocion a keda confisca pa autoridad’. Asina lider politico di partido MAS Holmo Henriquez a sigura NoticiaCla diamars atardi. E ta admiti si cu nan a manda busca material politico promocional for di Venezuela, y cu na nan yegada, douane a pone nan paga un multa riba dje. E informacion ta parti di un noticia cu a core henter dia awe riba rednan social, cu autoridad Venezolano y di Aruba a ‘confisca’ material promocional politico di tanto partidonan AVP y MAS. Mientrastanto e material a yega Aruba y esaki a keda atendi cune pa e respectivo partidonan. No a logra haya reaccion di parti di e partido berde (AVP) ainda. Mientrastanto e noticia cu a keda publica riba rednan Venezolano, no ta aparece mas riba e portal Venezolano tampoco y tin pues tur indicacion cu ta trata di 'fake news'. 

SITUACION PA MAS

Holmo Henriquez (MAS) a admiti cu recientemente nan a manda busca material promocional politico for di Venezuela. Specificamente t-shirt y bandera (pa auto). E motibo tabata cu no por a haya e t-shirt di e color blauw specifico cu nan tabatin mester. Henriquez a sigura cu nan a yega di busca material na Aruba den pasado, pero e biaha aki simplemente no tabatin mas. “Nos a busca tur caminda na Aruba” Henriquez ta sigura e portal aki. E ora a opta pa bay busca na Venezuela. No ta conoci riba cua bapor esaki a yega, y ta ora cu esaki a yega Aruba, nan a haya sa. Berdad cu mester a paga un multa pa parti di e cargacion. “Esaki pasobra tabatin material cu no tabata declara pero cu si tabata den e cargamento” Henriquez a sigui splica. Parse cu den e cargacion a bin un tipo di material (straw), cu nan no a order. Y como tal e no a aparece riba e documentacion, pero si den e cargamento. Como tal douane haciendo nan trabou di control, a pone e partido paga esaki. Henriquez a elogia e trabou di e douane tambe, cu ta simplemente haciendo nan trabou. Ta un di e consecuencianan di cargamento cu ta pasa tur ora den comercio. “Cosnan cu por pasa”, Henriquez a sigui bisa. Pero nada cu nan a purba pasa cos di contrabanda of sconde cos pa no tin cu paga impuesto. Segun e lider politico, oponente nan ta purba haci politica cu e asunto, siendo cu no ta necesario. Ta simplemente a haya nan mes ta busca material afo (na Venezuela) pa motibo cu no a hay'e aki na Aruba.

E PUBLICACION

Loke a hala mas atencion, ta un recorte di un portal cu ta circulando rond, di e portal ‘la informacion’ di Venezuela. Segun e publicacion, tanto autoridad di Venezuela como esun di Aruba a confisca material di (specificamente) partido AVP (no ta haci mencion di partido MAS), y cu ta trata di 300 mil dollar na material promocional. E material na salida di Punto Fijo, lo a keda confisca pa autoridad Venezolano, pa evita paga impuesto y otro cargonan necesario y evita e control necesario. Segun e publicacion, autoridad di Aruba lo a pidi esnan di Venezuela pa no publica e informacion pa motibo di ta algo sensitivo. Sinembargo den un accion controla cu cooperacion di douane di Aruba, a logra intercepta e material na salida di Venezuela y yegada na Aruba. Mientrastanto e publicacion no ta aparece mas riba e pagina, y e portal aki no por a verifica e autenticidad di e publicacion. Fotonan ta gara di rednan social, cu ta mustra e material di partido AVP cu tabata parti di e cargamento.