E Fokker-70 di Insel Air Aruba den proceso pa keda operacional

ORANJESTAD – E prome avion Fokker F-70 di Insel Aruba a yega e siman aki. Ta trata di e avion matricula P4-FKA di 80 pasahero. For di e CEO di e compania, Frederick Nuboer, NoticiaCla.com a compronde cu diahuebs y diaranson e ‘flight attendant nan’ lo mester a cuminsa cu nan entrenamento den e cabina, y esnan responsabel pa yena ‘fuel’ den avion tambe a cuminsa familiarisa nan mes cu e avion.

“Si tur cos ta bon, otro siman dialuna e asina yama ‘proving runs’ lo cuminsa, y lo uza destinacionnan manera Georgetown, Kingston y St Maarten. Tur esaki pa prueba na DCA (direccion di aviacion civil di Aruba) cu Insel Air Aruba ta cla pa uso di e avion aki”. Unabes cu tur e tramitenan aki ta cla, Insel Air Aruba ta spera di por cuminsa bula e avion aki na october, pa inicia nan buelonan comercial. E di dos avion tipo Fokker, cu matricula P4-FKB tambe ta kedando cla den e colornan di Insel Air y unabes cla, lo por bin Aruba tambe pa pasa den e mesun proceso cu e prome ta pasando aden. Riba e combinacion di potret por mira e yegada di e prome avion Fokker, su paden y un potret di e CEO di e compania, Frederick Nuboer, sinta den e cockpit di e avion.