Encuesta: Pro Hulandes na scol y matrimonio mesun sexo na Raad

ORANJESTAD – Mientras cu mayoria di esnan cu a participa den e ultimo encuesta di NoticiaCla y Doc Opleiding ta pro pa pareha di mesun sexo por casa pa Raad na Aruba, mayoria tabata contra pa cambia e ‘voertaal na scol di Hulandes pa Papiamento’. Ambos pregunta tabata parti di e seccion di debate unda cu lidernan politico den e debate di millennials por a contesta solamente si of no. Interesante ta cu mayoria di e lidernan politico den ambos caso a contradeci esnan cu a participa na e encuesta. Mayoria a vota contra pareha mesun sexo casa pa Raad, y pro cambio di idioma na scol di Hulandes pa Papiamento.

DETAYES

Durante e debate recien, e lidernan politico a haya 5 pregunta riba cual nan por a contesta solamente si of no. Mientras cu mayoria no a gusta e formato ey, a cumpli si cu e peticion. Entre nan, tabatin e pregunta controversial riba matrimonio di mesun sexo. Pa algun lider politico esaki tabata dificil pa contesta cu un solamente si of no. Entre nan lidernan politico di MAS y MEP a vocifera esaki na NoticiaCla. Di e 5 preguntanan, 3 di nan tabata igual pa tur lider politico, esta cu sea tur a contesta si of tur a contesta no. Den e caso di e dos temanan menciona solamente tabatin diferencianan, cu a resulta contraste totalmente entre esnan encuesta y politiconan mes. Den caso di matrimonio di mesun sexo, partidonan RED, RAIZ, UPP y POR tabata pro, mientras cu e otronan (MEP, PPA, MAS, CURPA y ABO) tabata contra. Pero esnan cu a participa den e encuesta tabatin otro pensamento. Mayoria (53.6%) a vota pro matrimonio mesun sexo na Raad, y 39.42% a vota contra. Den caso di e cambio di idioma di instruccion na scol, lidernan politico tabata un tiki mas diferente. Aki dos lider politico (MAS y CURPA) so a vota contra papiamento na scol como idioma di instruccion, mientras cu e resto di lidernan (RED, MEP, PPA, RAIZ, UPP, ABO y POR) a vota pa papiamento bira e idioma di instruccion. Esnan encuesta a vota 54.58% contra pa papiamento bira idioma di instruccion contra 38.85% cu si kier e cambio.

OTRO PREGUNTANAN

E otro preguntanan, tur tabata cuadra tanto entre e politiconan como esnan encuesta. P.e. Reduccion di aparato gubernamental, introduci impuesto indirecto vs impuesto directo, y publicacion di finanzas di partidonan politico. Keda pendiente pa mas analisis di e encuesta.