Aruba tin su prome caso confirma ‘local’ di virus Chikuncuya registra

ORANJESTAD – Aruba a conoce su prome caso confirma ‘local’ di e malesa Chikuncuya, cu ta trece e cantidad di casonan confirma na 3. Hefe di seccion di Malesa Contagioso Maribel Tromp a confirma esaki dialuna mainta. Di e tres casonan, 2 ta casonan importa, esta di hendenan cu a bin cu e malesa for di exterior. E di 3 caso, ta uno local, esta di un persona (persona hoben femenino) cu no tin historia di biahe. Pues esaki ta pone cu e ta registra como un caso local cu ta indica cu e malesa a haci su entrada na Aruba.

Cu e noticia aki, ta pone cu e situacion ta bira mas alarmante pasobra awo e sanguranan na Aruba tambe tin e virus aki y por pega hende localmente, cu tur su consecuencianan. Pa departamento di salud, ta bay monitor e casonan mas di serca y lo bringa esaki mas activamente. Manera ta e caso segun regla, e ta obliga departamento di Salud tambe cu mester avisa instancianan internacional cu Aruba tambe tin caso local di Chikuncuya. International Health Regulations mester a wordo informa siman pasa na Hulanda, cu na su lugar a informa WHO (World Health Organization) y PAHO. E consecuencia ta cu e lo aparece riba e websitenan respectivo. Den region mientrastanto tin un total 23 isla den Caribe cu a meld casonan di e virus aki, y na tur tin riba 4000 caso registra y confirma y 21 caso fatal.

Un persona por wordo infecta solamente door di pica di un sangura cu ta carga e virus, y ta e mesun sangura cu ta transmiti dengue. Ta importante pa sa cu e virus no por wordo transmiti di persona pa persona, sino solamente via pica di un sangura. E sangura si por pica mas hende den un tempo cortico, cu ta pone cu un famia por wordo pica asina. E persona cu wordo infecta, ta wordo isola na su cas, tin cu keda den airco, y tapa su curpa. No ta necesario pa e persona hospitalisa. Un simptoma ta dolor teribel di weso, y artritis feroz. Mucho mas cu e efecto di dolor ora cu un persona haya e malesa di dengue.