Doño di Amazonia Restaurant a kibra silencio

ORANJESTAD - E anuncio sorpresa di e ciere di Amazonia Restaurant a causa un serie di noticia rond di esaki riba kico por tabata e motibo cu a hiba na esaki y e situacion actual pa e trahadornan cu a keda awor sin trabou. Diahuebs, donjonan di e restaurant a kibra silencio y a bin dilanti cu e motibo cu segun nan, a causa e ciere di e establecimento. Amazonia Restaurant a habri su portanan pa prome biaha mas cu 10 aña pasa. “Pero desde e ultimo 7 añanan no tabata bayendo bon y tabatin perdida structural y continuo. E restaurant tabata pasando den momentonan dificil cu perdidanan grandi anualmente loke a haci cu a cuminsa evalua futuro di esaki”. Den e proceso aki a cuminsa papia cu Tim Smit, cu experiencia den Horeca, pa e posibilidad pa tuma e restaurant aki over y trata na lanta esaki bek. Na April 2014, Smit a dicidi pa cumpra e restaurant y sigui opera bou su maneho y principalmente cu idea y plannan pa trata na salba esaki y pone Amazonia bek riba pia. Asina por ehempel Smit a inverti den e sushi bar cu a keda cambia como tambe materialnan nobo pa bar y a cuminsa c’un mercadeo agresivo pa trata na toch logra pa Amazonia keda habri y cu esaki, trahadornan keda cu nan trabou.

Sinembargo despues di algun luna den e maneho, gerencia a realisa cu e concepto tabata uno dificil pa mantene mirando diferente factor cu tabata contra sobrevivencia di e restaurant aki. Pa cuminsa, e concept di All you Can Eat, pa cual Amazonia tabata conoci p’e, a resulta cu su prijs tabata toch demasiado abou pa por a garantisa ganashi algun contra e gastonan. Asina mes, Smit a purba na toch salba e restaurant cu cambionan. “ Pero na final, siman pasa, mester a tuma e decision sumamente dificil y sensitivo pero responsabel pa sera esaki pa evita mas daño y mas debe na otro personanan/companianan” e comunicado ta sigui bisa.

“Realmente mi a pospone loke lo por a tuma lugar algun luna prome caba prome cu mi a tuma e restaurant over, mirando e perdida cu e lugar tabata hibando pa via di no tabatin suficiente entrada pa cubri e gastonan “ Smit ta cuminsa na bisa.

E ta sigui mustra cu e la traha den horeca pa hopi tempo na Hulanda y ta prome biaha cu esaki no a logra. “ Pero mi ta kere cu esaki tabata un situacion inevitabel. Mi a haci mi maximo esfuerso pa salba Amazonia desde April, te na e ultimo dia. Ami mes no a haya ningun pago pa mi trabaonan y tampoco mi a uza fondo algun di e compania pa mi mesun uso den cualquier forma” Smit ta sigura.

E perdida ta grandi pa e trahadornan, pa kendenan e ta bisa di ta sinti masha hopi mes e momentonan dificil cu nan ta bibando. “ Mi a comprende di diferente empleado cu nan no ta comprende dicon nan no a keda informa di e situacion sensitivo cu e restaurant tabata aden mas prome” Smit ta continua. Segun e doño, e motibo tabata simplemente cu e no tabata kier pa crea panico y/of esaki demotiva nan den nan trabou cual por a duna un refleccion negativo riba e operacion di e restaurant y cual na su turno lo por a duna un efecto negativo den e proceso di buskeda di un investor/ partner pa salba Amazonia finalmente ainda. Como tal, esaki tabata un decision strategico cu den e situacion ey mester a keda tuma. Ademas, segun e doño, ta importante pa comparti cu den e weekend cu a pasa, ainda e delaster intentonan a keda haci di su parti pa trata na haya un hende/partner inversionista pa yuda nos y trata na mantene e restaurant habri.

“ Ora esaki no a logra mi no a wak niun solucion mas pa cubri e debenan di e compania na e momento ey, pasobra e entradanan di e bentanan no tabata suficiente pa por a sigui opera. Esaki a hiba nos cu muy probablemente nos mester bai acerca Corte cu ’un peticion pa declara e compania bancarota, cu consecuencia cu tur cos ta bai ta den man di curator”. Personalmente mi a inverti den e negoshi aki cu hopi gana. P’esei mi ta comparti e perdida aki cual tambe ta uno pa e localnan, cu tabata gusta Amazonia masha hopi mes. Actualmente, di mi mesun esfuerzo mi ta acercando diferente otro companianan solido estableci riba nos isla, pa mira si mi por yuda y logra ‘aloca’ tur e ex trahadornan di Amazonia den companianan nobo pa nan por haya un trabou lo mas antes posibel. Mi tabatin e speransa cu toch Amazonia por a sali aflote, pero na final, e tabata simplemente imposibel.