Sancion Mericano contra Venezuela por afecta PDVSA

WASHINGTON – Merca ta considerando sancion financiero contra Venezuela, cu lo para pago pa e petroleo di e pais. Asina un consehero di Cas Blanco a sigura e agencia di noticia REUTERS. E paso aki ta restringi e exportacion di crudo di Venezuela severamente. sancionnan prohibiendo cualkier transaccion den dollar pa e compania petrolero PDVSA ta entre e medidanan pisa bou di discusion di Cas Blanco y presidente Mericano Donald Trump. Cu e medida aki, Trump kier presiona e presidente Venezolano Nicolas Maduro di introduci un congreso y constitucion nobo fin di e luna aki, cu ta practicamente dun'e e poder di un dictador di e pais. Si esaki por afecta Aruba y CITGO, no ta conoci. Intento pa haya reaccion di esnan envolvi, no tabata exitoso ainda. 

EFECTO DI SANCION

Sancion riba transaccion di dollar lo haci'e mas dificil pa e gobierno Venezolano pa sigura cash pa paga nan debe internacional y financia importacion di productonan basico. No ta conoci si esaki lo afecta e situacion di CITGO di Aruba tambe. Cas Blanco mientrastanto a nenga di duna comentario riba e posibel sancionnan na caminda. E medida lo duna Trump e poder pa escala presion riba Venezuela pa menasa cualkier compania Mericano haci negoshi cu PDVSA of banconan Mericano procesa cualkier transaccion den dollar.

EFECTO INTERNACIONAL

Segun Reuters, sancion riba transaccion di dollar por ta mas severo cu un prohibicion riba importacion, pasobra elo haci'e mas dificil pa cualkier refineria of comerciante cumpra petroleo di Venezuela, no solamente clientenan. E impacto di sancion riba PDVSA lo tin sacudi mercadonan petrolero internacional, forsando refinerianan pa busca petroleo otro caminda.