Xander Bogaerts conmovi pa morto di su amiguito Ari Schultz

ANAHEIM, Calif. — Pelotero profesional di Aruba, Xander Bogaerts, a keda sorprendi cu e morto repentino di e hobencito Ari Schultz (5) algun dia pasa. Manera NoticiaCla a raporta recientemente, e hobencito Mericano a considera Bogaerts como su heroe y Bogaerts a priminti Schultz pa tira e prome bala otro luna durante un di e weganan. Lamentablemente Schultz a fayece algun dia pasa. Bogaerts, segun e corant Boston Globe, mester a compone su mes prome cu e por a papia riba e hecho tristo aki. “Mi no por kere cu esaki a pasa asina lihe” Bogaerts a bisa riba e caso den fin di siman. “E tabata parce di ta recuperando asina bon”. Schultz a fayece diabierna ultimo.

BISHITA BOGAERTS

Bogaerts y colega di ekipo Christian Vazquez a bishita Schultz dia 14 di juli ultimo na su cas y a pasa casi 3 ora hungando baseball y futbol Mericano. Vazquez a priminti e hobencito di lo tabata su catcher ora cu Schultz lansa e prome bala dia 27 di augustus proximo. “Nunca mi no tabata den compania di un hoben asina alentador” Bogaerts a bisa. “E noticia aki, e ta asina tristo. E tin un famia special” e pelotero a bisa di e morto di e hobencito. Tabata apenas 6 dia despues di su bishita, cu Schultz a fayece.

MORTO DI SCHULTZ

E hobencito di Boston Ari Schultz, recipiente di un transplante di curason, a fayece diabierna, un luna prome cu e tabata pa bay wak su heroe y hungador di Boston Red Sox, Xander Bogaerts hunga baseball. Tabata riba e mesun dia cu e famia a publica e video di e bishita recien di Xander na su cas, cu e hobencito a haya complicacion y mester a keda interna urgentemente atrobe na hospital. Ari tabatin apenas 5 aña di edad. “Ari a bay sosega pacificamente awe nochi, scuchando Red Sox”, e famia a pone riba su pagina di Facebook.

E storia di Ari a bay viral e aña aki ora cu su mayornan a publica su storia riba nan blog (diario electronico personal), splicando cu e tabatin mas di 10 operacion, incluyendo esun di transplante di curason. E tabata na cas despues di a permanece den hospital pa 186 dia prome. “Nos a yama 911 pa 4:19 am mientras cu Ari tabatin un atake “ e famia a skirbi diahuebs mainta. E situacion a empeora cu a pone Ari den cuido intensivo. Finalmente diabierna anochi Ari a fayece.