Erin Croes acerca como posibel reemplaso pa Paul Croes

ORANJESTAD – Ruman muher mayor di minister Paul Croes, esta Erin Croes, a wordo acerca pa posiblemente reemplace, si e mandatario no bolbe riba lista (di partido AVP). Erin Croes awe tardi a confirma esaki pa NoticiaCla. “Mi por bisabo cu mi a wordo acerca” Croes a confirma pa e e portal aki. Mas informacion e no por a bisa. Pero ora cu a puntr'e si e acercamento tabata pa reemplasa su ruman, ela bisa “si”. Mas informacion e no por a duna aworaki, pero a priminti cu otro siman elo tin mas informacion riba e tema. Manera ta conoci Erin Croes ta ruman muher mayo di e mandatario, y tabata hopi instrumental den su carera politico, sigur den e parti di relacion publico. E pregunta di reemplazo a surgi diasabra ora cu –manera e portal aki a raporta anteriormente caba-, e portal 24ora a puntra lider di partido berde AVP Mike Eman si ta berdad cu Erin Croes a keda acerca. E mandatario no kier a bay den detaye pero si a menciona un posibilidad.

EMAN

Ora cu e portal 24ora a puntra e lider di partido riba e hecho cu ta papiando di un persona di mesun sanger di Paul Croes, cu lo por reemplas'e a puntra si ta trata di su ruman mayor Erin Croes, Eman a prefera di no bay den e tema ey, bisando solamente cu nan tur ta bin di un famia unda cu uno ta sigui e otro, haciendo mencion di su mesun famia, famia di Nel Oduber, y tambe Croes, unda cu ruman ta sigui otro den politica. Pues no por a confirma si Erin Croes enverdad ta e persona cu por reemplasa Paul Croes riba e proximo lista di AVP. Den pasado, ora cu actual miembro di MEP Glenbert Croes tambe a hay'e den problema breve durante su tempo como minister pa partido OLA, su ruman homber Juni Croes a asumi e funcion temporalmente di minister.

DECISION

Tambe manera e portal aki a raporta awe caba, decision no a cay ainda si Paul Croes ta bolbe riba lista di partido berde AVP. Asina lider di e partido Mike Eman a declara den un entrevista na e website 24ora diasabra merdia. Eman a confirma cu enberdad e loke a crea a impresion ey, ta e decision di Croes diabierna pa no aparece na e apertura di Green Square. Esaki pa no ‘crea e confiansa’ entre su seguidornan cu elo ta riba e lista proximamente. Dia 4 di augustus proximo e partido tin cu entrega su lista y pa e fecha ey mester tin claridad. Croes a bisa Eman tambe cu si e no tin claridad pa e tempo ey, elo no kier ta riba e lista. Eman a splica e portal cu nan ta sostene e decision ey tambe.