Eman: No a dicidi ainda si Paul Croes ta bolbe riba lista

ORANJESTAD – Decision no a cay ainda si Paul Croes ta bolbe riba lista di partido berde AVP. Asina lider di e partido Mike Eman a declara den un entrevista na e website 24ora diasabra merdia. Eman a confirma cu enberdad e loke a crea a impresion ey, ta e decision di Croes diabierna pa no aparece na e apertura di Green Square. Esaki pa no ‘crea e confiansa’ entre su seguidornan cu elo ta riba e lista proximamente. Ta for di mainta tabatin informacion ta circula riba rednan social cu Croes lo a retira di e partido y/of no pone su mes disponibel pa ta riba lista. Dia 4 di augustus proximo e partido tin cu entrega su lista y pa e fecha ey mester tin claridad. Croes a bisa Eman tambe cu si e no tin claridad pa e tempo ey, elo no kier ta riba e lista. Eman a splica e portal cu nan ta sostene e decision ey tambe.

INVESTIGACION ANDANDO

Segun Eman, Croes a spera cu pa aworaki e investigacion contra su persona (caso Ibis) den cual e ta e sospechoso principal di varios cargo, y cu tin varios persona deteni, lo ta cla caba. Sinembargo esaki no ta e caso y como tal tin un incertidumbre di kico por pasa cu ne. Y Eman a confirma cu Croes ta pensa cu si no tin claridad, miho e no aparece riba e lista. Como tal Croes a informa su seguidornan pa ‘wanta un rato’ cu continuacion di su campaña, te ora cu tin mas claridad. Contrario na esaki, algun siman pasa durante su conferencia di prensa riba e tema di su caso, ela informa cu elo a continua cu su campaña como candidato, pasobra como candidato e por sigui, mientras cu e ta wordo investiga como minister.

REEMPLASO

Mes momento a bin e informacion cu Croes lo por wordo reemplasa pa un hende di su mesun sanger, esta su famia. Ora cu e portal a puntra e lider di partido si ta trata di su ruman mayor, Erin Croes, Eman a prefera di no bay den e tema ey, bisando solamente cu nan tur ta bin di un famia unda cu uno ta sigui e otro, haciendo mencion di su mesun famia, famia di Nel Oduber, y tambe Croes, unda cu ruman ta sigui otro den politica. Pues no por a confirma si Erin Croes en berdad ta e persona cu por reemplasa Paul Croes riba e proximo lista di AVP. Den pasado, ora cu actual miembro di MEP Glenbert Croes tambe a hay'e den problema breve durante su tempo como minister pa partido OLA, su ruman homber Juni Croes a asumi e funcion temporalmente di minister. Den combersacion breve cu ruman di Paul Croes, esta Erin, ela mustra NoticiaCla awe mainta cu e no tabata na altura di decision di Paul pa no ta riba lista. Mas despues a puntr'e si e ta un posibel candidato pa reemplasa su ruman, e no a duna contesta ainda.