Hobencito cu ta considera Xander Bogaerts su hero, a fayece na Merca

BOSTON – E hobencito di Boston Ari Schultz, recipiente di un transplante di curason, a fayece diabierna, un luna prome cu e tabata pa bay wak su heroe y hungador di Boston Red Sox, Xander Bogaerts hunga baseball. Tabata riba e mesun dia cu e famia a publica e video di e bishita recien di Xander na su cas, cu e hobencito a haya complicacion y mester a keda interna urgentemente atrobe na hospital. Ari tabatin apenas 5 aña di edad. “Ari a bay sosega pacificamente awe nochi, scuchando Red Sox”, e famia a pone riba su pagina di Facebook.

E storia di Ari a bay viral e aña aki ora cu su mayornan a publica su storia riba nan blog (diario electronico personal), splicando cu e tabatin mas di 10 operacion, incluyendo esun di transplante di curason. E tabata na cas despues di a permanece den hospital pa 186 dia prome. “Nos a yama 911 pa 4:19 am mientras cu Ari tabatin un atake “ e famia a skibi diahuebs mainta. E situacion a empeora cu a pone Ari den cuido intensivo. Finalmente diabierna anochi Ari a fayece.

Recientemente e pelotero profesional di Aruba Xander Bogaerts hunto cu colega di ekipo Christian Vasquez a bishita cas di Ari y a dun'e algun regalo (glove, bala, petchi y tshirt di Red Sox), y a invita Ari pa e tira e prome bala na e wega di Red Sox dia 27 di augustus proximo. Lamentablemente Ari a fayece prome. E famia a post e video di e bishita riba internet, riba e mesun dia cu Ari a keda transporta pa hospital. Por mira e video AKI.