Resultado encuesta NoticiaCla/Doc Opleiding riba debate di Millennials

ORANJESTAD – Segun e ultimo encuesta politico realisa pa NoticiaCla y Doc Opleiding, debatenan ta sigui ta un instrumento importante pa dicidi e patronchi di voto di un ciudadano, aunke no e unico. Tambe a demostra cu e grupo di votadornan indeciso ta sigui grandi, y tambe e grupo cu no ta dispuesto pa bisa ainda pa ken nan vota, aunke cu e encuesta ta anonimo. E biaha aki e debate tabata specificamente dirigi pa haya sa e pensamento di e comunidad riba e debate di millennials y e lidernan politico cu a participa.

INTENCION ENCUESTA  

E ultimo encuesta aki ta den cuadro di e serie di encuesta organisa pa NoticiaCla y Doc Opleiding pa provee un bista di e preparacion di nos comunidad pa cu eleccion y nan pensamento riba e tema. E concentracion di e encuesta tabata riba e anochi di debate di millennials ‘Debate Politico Constructivo”, cu pregunta riba e percepcion general di e anochi, e presentacion di e partidonan participante, y e opinion di esnan cu a contesta e encuesta riba e opinion di e topiconan discuti. Tambe a pidi e informacion demografico pa wak cua grupo di persona ta participa. E pregunta di cua partido pa vota pe ta provee un indicacion general di preferencia politico di e grupo encuesta, y un trend comparando e contestanan cu e otro encuestanan anterior y di futuro. Pa publico en general, e ta provee un indicacion di cua seccion di e populacion ta considerando politicamente. Pa e partidonan e ta provee un bista di e opinion di e grupo encuesta, aproximadamente 2.3% di e populacion cu por vota, y particularmente e grupo cu ta indeciso.

ALGUN DATOS INTERESANTE

E grupo cu ta indeciso ta sigui grandi, y e grupo cu a contesta e encuesta ta halto bou di e millennials (37.5%). Aunke mester bisa cu solamente 28.8% di e millennials ta cay bou di e grupo cu actualmente por vota pa e eleccion di 22 di september. Esey ta significa cu 3% di e grupo aki a participa den e encuesta. Tambe e encuesta a confirma e observacion di e ultimo encuesta, esta cu un debate por ta beneficioso y importante, specialmente pa partidonan nobo y nan lider. Si cu algo e encuesta aki ta yuda, ta cu e ta provee un bista riba e desaroyo di e proceso pa dicidi e voto pa e grupo encuesta. NoticiaCla y Doc Opleiding no ta pretende cu e encuesta ta un pronostico husto di e resultado di eleccion di 22 di September. Pa esey, e eleccion mes ta e miho encuesta posibel. Loke si ta e caso, ta e cantidad di participante ta hopi significativo, pues e informacion di e escogencia di e participantenan ta hopi valioso, cu e precaucion cu e metodo di e encuesta no ta pretende di haci'e representativo pa e populacion cu por vota, y como tal niun partido mester declara victoria ni derota, debi na e resultado publica di e encuesta.  

RESULTADO PRELIMINAR

Un total di 1698 persona a participa na e encuesta aki di cual 644 tabata consisti di e grupo di ‘millennials’ (edad 18-35). Pa loke ta e resultado en grande, Evelyn Croes di MEP a sali como e ganador di e anochi, sigui pa Otmar Oduber di POR y Ursell Arends di RAIZ. E ultimo dosnan riba e lista ta Holmo Henriquez di MAS y Christina Lampe di CURPA. Y e partido MEP ta sigui ta e partido mas grandi sigui pa e grupo cu no sa ainda pa ken nan vota, y e grupo cu no kier bisa. E tresnan na ultimo lugar ta empata cu ta PPA, CURPA y ABO. Keda pendiente pa mas resultado di e ultimo encuesta haci. 

GANADOR DI E DEBATE DI MILLENNIALS: