Aumento BBO pa sostene AZV na Raad van Advies

ORANJESTAD - E aumento di BBO cu 1% pa e sostenibilidad di e fondo di AZV manera anuncia pa gobierno, ya ta na Raad van Advies segun declaracion di Minister di Finanza Angel Bermudez diaranson. E aumento menciona mester a keda introduci 1 di september pero no a keda cla manera cu NoticiaCLa.com a raporta caba. Gobierno a raporta diaranson tambe cu e ta spera cu pa fin di luna e prome conceptonan di e cantidad di cambionan anuncia diamars pa gobernador interino , lo por wordo entrega dor di e comision, pa asina prepara e dialogo cu tur gremio den comunidad pa cu e cambionan den vision.

“Por wordo spera un reforma di nos sistema social, nos sistema fiscal y nos sistema presupuestal”, Minister di Finanzas, Angel Bermudez a indica. “Lo reduci e arsenal di nos leynan di belasting y adapta nan na reglanan internacional moderno. Esaki ta conta tanto pa nos leynan di impuesto directo (loon-, inkomsten- y winstbelasting), como esunnan indirecto (BBO, invoerrechten y accijns). Esaki den combinacion cu mas digitalisacion, lo optimalisa e cumplimento cu nos leynan concerni. Tambe lo wordo considera introduccion di e asina yama ‘financial transfer levy’, cual mester garantisa e fondo di inversion cu entrada necesario”, Minister di Finanzas a splica.

Na mes momento lo adapta e riesgonan cu APFA ta coriendo pa motibo di un rendimento mucho abou pa cu su inversionnan. Gobierno lo deposita un suma di alrededor di 170 miyon den APFA, pa asina garantisa e solvencia na 100% y alabes e pensioen di e participantenan. Segun Minister Bermudez tanto gobierno di Aruba y e sindicatonan ya a yega na acuerdo cu e reforma aki den e protocol di mei 2014 y pronto e concepto di ley lo wordo entrega na Staten.

Pa supervisa e proceso aki, lo ancra den nos sistema legal un ‘Conseho Fiscal’ pa monitor y supervisa e progreso di e presupuesto. Na 2015 tambe lo bay defini e pakete di servicio cu Gobierno lo por ofrece nos comunidad den futuro, pa asina determina capacidad y capabilidad necesario di nos payroll. Un proceso di digitalisacion lo yuda aumenta e efectividad y calidad di servicio. Di e manera aki por haci mas cu menos y continua reduci e gastonan di e aparato gubernamental.