Ezzard Cillie a bira director interino di hospital

ORANJESTAD – Beleidsmedewerker Ezzard Cillie a keda selecta como e proximo director interino di Horacio Oduber hospital. Esaki a keda confirma diaranson anochi na NoticiaCla.com cu e hunta di supervision nan decision a cay porfin. Un siman mas laat cu a premira. E periodo cu Cillie lo maneha e hospital, ta pa un periodo di 6 luna.

Cillie su candidatura tabata conta cu sosten di hopi grupo dentro di hospital Horacio Oduber, y particularmente e sindicato ABV segun presidente Gina Maduro na Noticiacla.com. E intencion tabata pa siman pasa pa diamars, directiva di hospital scohe entre tres candidato, esun pa asumi e funcion di director interino te ora e director mes wordo scohi. 

E presidente di ABV, Gina Maduro a confirma e momento ey na NoticiaCla.com cu nan a papia cu Hunta di Supervision y cu nan a duna nan ‘conseho’ y ‘sosten’ pa Cillie haya e posicion aki’ pasobra ‘e ta e candidato mas fuerte’. Segun Maduro, e trayecto di Cillie ta dune e motibo pa lidera hospital por lo pronto, pendiente e nombracion di un director di hospital definitivo. NoticiaCla.com a compronde cu un director general lo por wordo nombra pa comienso di otro aña (probablemente januari of februari 2015). Cillie tin 30 aña trahando na Hospital Horacio Oduber, ta dirigi riba varios departamento y ta mes momento ex hefe di varios di e departamentonan aki. Ademas e ta ex presidente di e sindicato ABV tambe. Pues segun Maduro, Cillie ta e ‘front runner’pa e funcion.

E informacion tambe cu NoticiaCla.com a trece recientemente, ta sigui vigente, cu ta e candidato pa bira e proximo director di hospital, (Cillie ta interino) esta actual minister di husticia Arthur Dowers. E ta keda un candidato clave y cu ta goza di sosten di esnan cu ta den poder pa tuma e decision aki. Palabranan manera 'e ta e candidato perfecto' a cay recientemente. Dowers, contrario na e prome biaha cu a aserk’e algun aña pasa, a bisa e biaha aki cu si e wordo acerca, y cu tin un proposicion serio y atractivo, e lo considera esaki seriamente. Mientrastanto e ta haci su trabou di minister pa cual e la wordo pidi pa haci. Si dado caso esaki materialisa, Dowers lo por haya e posicion pa comienso di fin di otro aña, y lo mester bin cambio di minister den e gabinete Mike Eman II. Pa loke ta e posibilidad di reemplazo pa minister Dowers, tin mencion di e.o. parlamentario Desiree Croes.