Meteo: Tormenta tropical Don lo kibra prome cu yega Aruba

ORANJESTAD – Segun servicio meteorologico di Aruba, mientras cu tormenta tropical Don ta riba mesun trayecto cu tormenta Bret, e tambe lo kibra prome cu e yega Aruba y bira un ola tropical. Asina nan ta avisa den nan boletin di 8'or localmente. Modelonan di tempo ta pone cu e ta kibra prome cu e yega Bonaire diaranson. Sinembargo awacero y biento relaciona cu e resto di Don, lo keda pa nort di Aruba entre diaranson anochi y diahuebs marduga.

E PRONOSTICO DI 5’OR

Manera cu e portal aki a raporta anteriormente, un area di presion abou situa oost- zuidoost  di e islanan mas oost di Caribe a sigui desaroya y bira tormenta tropical Don. Don tabata situa 5 pm ora local na 780 km oost zuidoost di Barbados y ta moviendo den direccion west. Servicio meteorologico di Aruba lo mantene e sistema aki na bista y si ta necesario emiti aviso. Tabata practicamente un luna pasa cu Aruba tabata den preparacion pa yegada di tormenta tropical Bret. A tene un cantidad di reunion, conferencia, pero despues e tormenta a hala bay nort manera cu e sa haci. Lo mas probabel ta cu e biaha aki atrobe e haci mescos. Keda pendiente pa e desaroyo aki.