Sevinger: Mota Engil dispuesto pa coopera cu contratistanan local

ORANJESTAD – “Tur hende ta haya trabou” tabata palabra di minister di infrastructura Benny Sevinger dialuna mainta. Su reaccion riba e situacion cu a surgi diabierna ultimo ora cu doñonan di trucknan grandi local a protesta na e rotonde provisional na ex Codemsa ora cu e contratista Mota Engil a trece nan propio flota di ekipo grandi pa proyecto di Watty Vos Boulevard. E ta admiti cu ta normal cu companianan cu gana e destaho, por trece nan mesun ekipo, y cu aki tambe esey a sosode. “Pero nan a bay di acuerdo pa coopera” Sevinger a bisa, den forma cu ta bay wak te con leu por acomoda esnan local pa uza nan equiponan pa e proyecto di Watty Vos Boulevard. A mustra cu ora di destaho, ta bay pa e cantidad di trahado, y no necesariamente ekipo. Esey no a bay diferente e biaha aki. A priminti tambe cu e trucknan cu a yega Aruba, lo no subi tereno, sino solamente si no tin otro ekipo pa haci e trabou nan necesario. A mustra tambe cu ta e companianan chikito mester acerca esun cu a gana e destaho, pa ofrece nan servicionan. Algo cu a sosode diabierna. Y a keda cu ta entrega lista di ekipo na DOW pa por mira kico tur mester y no. Ademas e mandatario ta para banda di e contratistanan chikito cu mester di trabou y lo sostene nan tambe. Semper y cuando e cos cana manera mester ta y sin regla. Pero no si esaki ta motiva politicamente.