Chauffeur di trucknan grandi a blokea rotonde provisional na Codemsa

ORANJESTAD – Chauffeurnan di e asina yama ‘heavy equipment’ a protesta diabierna atardi (rush hour) na e rotonde provisional y cercania di Codemsa, door di blokea esaki cu nan trucknan. Motibo di e blokeo y protesta ta e hecho cu e contratista Mota Engel a importa un cantidad di truck for di Peru, pa haci e trabou nan necesario di e Watty Vos Boulevard, envez di uza trucknan local. Ta haci mencion di entre 20 pa 26 truck cu a yega Aruba y cu ta cla pa wordo uza. Mesora polis a acudi na e sitio pa establece orden, y a nota presencia tambe di alto comisario di polis Dolfi Richardson. Tambe tabatin politico presente cu a bin pone nan mes na altura personalmente di e situacion. Potretnan ta cortesia 24ora.com