De Meza: CITGO a aproba placa pa rehabilita refineria caba

ORANJESTAD - CITGO Aruba y CITGO Holding di Merca ta cla cu financiamento y ta pendiente transferencia pa nan cuentanan di banco local, pero ta sperando aprobacion di Banco Central di Aruba pa certificacion. Tambe Banco Central mester presenta nan un licencia pa certificacion di “Foreign Exchange”. Un ke otro tin di haber cu leynan di supervision di e sector financiero den cual Banco Central mester scrutina transaccionnan bancario di e magnitud aki. E companianan a haci un apelacion riba Banco Central pa por procesa e tramitenan mas lihe posibel. Asina gobierno a informa pa medio di un comunicado.

"Nos ta pendiente esaki pasobra asina cu e fondonan ta disponibel, lo por cuminsa mira mas accion riba tereno di refineria", asina Mike de Meza, Energia y Medio Ambiente a duna di conoce e siman aki. Ta bon pa splica cu e trabou grandi di rehabilitacion ta den man di e concorsio di contratistanan internacional, pero cu lo uza companianan y trahadonan local den su capacidad maximo pa haci diferente proyecto. Pues e trabounan lo ta parti den varios proyecto, pa cual trahadonan local cu experencia den e refineria lo ta e prome nan pa haya un chens pa traha.