Debacle di ken a surpasa presupuesto ta continua

ORANJESTAD – E debacle entre AVP y Mep di ken a surpasa presupuestonan a continua diaranson. For di momento cu e cuenta anual di 2013 a keda entrega, partidonan opositorio ta ataca otro riba ken a surpasa cua presupuesto. Y ora cu partido opositorio MEP a entrega keho contra gobierno actual, gobierno a cuminsa nan intento pa demonstra cu nan ta corecto y cu oposicion a subi e 'cabay robes'. For di e momento ey, nan ta den discusion riba e tema aki.

Tabata diaranson cu esaki a continua entre Minister Otmar Oduber di turismo, cu riba su pagina di Facebook a continua (despues cu e la inicia cu esaki dialuna ultimo den un conferencia di prensa) cu declaracionnan y tabel pa demostra su punto. Pa demostra su punto, Oduber a bay bek te aña 2000 pa mustra cu eynan  e presupuesto a wordo surpasa cu 127 miyon. “Na 2001 e la wordo surpasa cu 206 miyon, na 2002 a surpase cu 54.9 miyon, na 2003 e la wordo surpasa cu 88.8 miyon, na 2004 a surpasa presupuesto cu 89.9 miyon, na 2005 a surpase cu 73.7 miyon, na 2006 e la wordo surpasa cu 19.1 miyon, na 2007 a surpase cu 67.4 miyon, na 2008 e la wordo surpasa cu 38.7 miyon” Oduber a sigui menciona. Segun Oduber, e la haci esey pa refleha cu no ta pa culpa otro, sino pa ta sincero cu comunidad. “ Pa splica di berdad kico ta e ponencianan cu ta ser treci dilanti” e mandatario ta sigui bisa. “Y mi ta haye importante pa desenmascara e forma cu ta malusa e informacion di Rekenkamer, siendo cu ta trata di un situacion cu a bin ta tuma lugar bou diferente gobierno debi na e falta di reglanan, maneho y mas personal capacita den Gobierno pa por logra yega na un jaarrekening aproba”. Oduber a bay asina lew di pone un tabel cu cifra pa demonstra su punto. (mira e tabel aki)

Reaccionando diaranson mainta, lider di partido MEP Evelyn Wever tabatin su contesta pa Oduber. “Tur e saldonan aki a wordo discuti y a palabra entre parlamento y gobierno cu lo a trek un streep di 1986 te cu 2010 pa no tin discussion entre kico MEP a hasi malo y kico AVP a hasi malo, incluyendo e caso di fondo desaroyo San Nicolas” Wever a cuminsa na bisa. “Dus di e tal Otmar mes, e palabracion hasi entre gobierno y parlamento tabata un compromiso masha importante cu intencion pa despues di 2010 si tur gobierno tene nan mes na regla y ley”. Pues segun Wever, e tabata pa tene nan mes na no surpasa ningun presupuesto y pa duna cuenta den jaarrekening. “Dus si Otmar kier bai bek den tempo, be my guest, tur investigacion ta bai tambe bek den Fondo Desaroyo San Nicolas, Interbank, etc. Nos no tin miedo di dje” Wever a sigui bisa. “ E tin cu tene cuidou pasobra e ora cuidou cu Strawberry-gate, Bushiri-gate , etc cu ministerio publico tene aden di biaha pa e casonan ey”.