Debate di millennials a sigui sin problema sin presencia di AVP

ORANJESTAD – No obstante cu e partido den gobernacion (AVP) tabata e gran ausente diahuebs anochi, e prome (di posibel mas) debate di e grupo di millennials a tuma lugar sin ningun problema. Sin ningun problema den e sentido cu e formato a keda adapta cu a pone cu e no a stroba e anochi di sigui. Di otro banda, sin AVP, e no tabata completo, aunke varios biaha e partido POR algun biaha a bira e ‘punch bag’ di e Opositornan, pa motibo cu su lider tabata te cu aña pasa ainda parti di e gabinete actual. Si e debate a logra su meta, tin cu mira ainda, esta si esaki a logra convence esnan indeciso pa ken nan tin cu vota. E formato tabata un poco mas diferente cu esun di KVK, unda cu tabatin dos moderador y tambe un MC. Y obviamente mas lider compara cu esun anterior, aunke e gran ausente tabata lider di partido AVP. 

MOMENTONAN CU A RESALTA

Esun cu mas a resalta durante e ultimo debate (di KvK) esta Ricardo Croes, un biaha mas a resalta cu su remarke nan cu hopi a considera chistoso, pero a haya e reaccion cu e no tabata realmente contesta preguntanan na comienso. Pero manera e ultimo biaha, ayera nochi un biaha mas su presentacion a resalta, no necesariamente pa contenido sino pa presentacion. Esnan cu biaha pasa no tabata presente, ABO, CURPA y RAIZ tambe a laga nan marca atras. Algun di nan mas miho cu otro, pero a resalta di nan mesun forma. Esnan cu a wordo considera como e ‘ganadornan’ di e anochi tabata MEP y POR segun e comentarionan tanto riba rednan social como esnan cu tabata den sala y cu e portal aki a papia cu ne (check e entrevista riba e pagina di FACEBOOK di NoticiaCla).

E PROME IMPRESION DI MILLENIALS

Loke si a resalta grandemente tabata e forma profesional cu e grupo di 20 hoben a organisa e evento y presenta esaki ayera nochi. Comentarionan manera ‘e ta miho cu Camara di Comercio’, y ‘Camara di Comercio por siña di nan’, y ‘e set up tabata strak’, a resalta e anochi ey. Camara di Comercio su representantenan mes tabata presente y a admiti cu enberdad e tabata un anochi fabuloso. “Nos a yuda cu cierto partinan tambe” representante di Kvk a bisa e portal aki ayera nochi. For di e parti grafico riba stage, te na e maneho di e tempo, tipo di pregunta y e parti logistico, sigur el a laga un impresion profesional atras, y QueenAnn Bergen y su team por wak atras riba un anochi cu a haci su trabou, esta presta e plataforma pa laga lidernan politico presenta nan mes na e comunidad. E critica cu e tabata largo, y cu dado momento hende a cansa pa laga tur 9 lider cada bes contesta, ta un di e risico nan di tin tur hende riba escenario. Pero esey no ta kita afo cu e tabatin un audiencia grandi, tanto prome, durante y despues di e evento. Tin informacion cu e proximo debate di e grupo lo ta uno cu e candidatonan millennial mes.