Awe mainta DTZ literalmente a desconecta operacion di MIO

ORANJESTAD – Dos siman despues cu gobierno a notifica e compania cu nan ta perde nan licencia, Directie Telecomunicatie Zaken (DTZ) a literalmente ‘pull the plug’, osea saca e compania di telecomunicacion MIO for di aire. “Mi por confirma cu MIO ta wordo desconecta awe mainta” minister di telecomunicacion Richard Arends a confirma na NoticiaCla awe mainta. E portal aki for di comienso a raporta riba e proceso di e compania di telecomunicacion, cu awe ta yega oficialmente na final. Motibo di e desconeccion ta incumplimento di pago di suma di 15 miyon di licencia na gobierno.

DOS SIMAN PASA

Tabata dos siman pasa cu e compania a haya notificacion oficial di parti di gobierno, cu nan ta perde nan licencia y cu nan network ta wordo desconecta. Gerencia di e compania a confirma publicamente (completo cu carta di deurwaarder y orden di gobierno) di e acto aki, y a confirma mes momento cu nan lo no ‘bringa’ e caso aki. Pa loke ta gobierno, pa buena marcha a opta pa no haci esaki den un forma abrupto, esta di desconecta e switch ya riba 1 di juli manera cu e decreto firma ta duna nan autorizacion pa haci. Nan a duna e clientenan oportunidad pa por cambia di compania ( si nan tabatin deseo di esaki) y a cuminsa un otro proceso di desconecta e celsitenan prome, y asina duna clientenan 2 siman di tempo pa ‘regla’ nan cosnan. Asina a evita cu entre 4 pa 6 mil cliente lo a keda desconecta un dia pa otro, cu tur consecuencia cu esaki por tabatin.

NOTIFICACION FOR DI DECEMBER

E portal aki a lidera e noticia aki for di comienso y for di januari ultimo a confirma cu gobierno a duna e compania en cuestion 6 luna extra pa cumpli cu nan pago, pero ni asina no a tende nada di e compania. Na maart/april gobernador a manda nan carta atrobe y despues gobernador a firma un decreto, autorisando gobierno pa ‘pull the plug’ pa 1 juli 2017 si MIO no cumpli cu nan pago. Algo cu a tuma lugar tambe. MIO na su turno, a mustra cu nan dificilmente por a cumpli cu e exigencia di e pago, mirando e tipo di competencia cu nan mester a enfrenta (SETAR Y DIGICEL) cu ta companianan cu ta mucho mas grandi. A admiti cu nan a percura pa cumpli cu nan clientenan, paga tur nan debenan operacional semper, pero te ey. No por a cumpli cu e suma di licencia y como tal ta entrega e bataya. Cu esaki tambe e operacion di MIO oficialmente ta yega na final awe.