Ta cera caminda y desvia trafico na Cumana pa proyecto Watty Vos Boulevard

ORANJESTAD – Diasabra awor ta cera caminda y desvia trafico na Cumana relaciona cu proyecto Watty Vos Boulevard. Asina Departamento di Obra Publico, compania Mota Engil y compania di utilitdat Setar a informa pueblo di Aruba pa medio di un comunicado. Automobilistanan cu ta haci uzo di e caminda principal di Oranjestad pa Santa Cruz, y e rotonde provisional di Caya Betico Croes y Watty Vos Boulevard, mester tene cuenta pues cu diasabra awo, 15 juli 2017, ta cera e rotonde parcialmente pa trafico. Setar tin trabou nan pa haci relaciona cu e proyecto di Watty Vos Boulevard y pa motibo di esaki tin cu cera parti di e rotonde menciona.

Trafico for di Sta Cruz direccion Oranjestad/ Sabana Blanco ta wordo desvia via di e caminda di Cumana pa Meiveld y pasa patras di ex edificio di Codemsa y bolbe bek riba e caminda principal di direccion Oranjestad/ Sabana Blanco. Trafico di Sabana Blanco ta wordo desvia direccion Sta Cruz y despues pa e caminda di Cumana pa Meiveld y pasa patras di ex edificio di Codemsa y bolbe bek riba e caminda principal pa direccion Oranjestad. E desviacionnan na e rotonde lo keda indica cu baricadanan y borchinan di aviso. Ta cera e caminda menciona entre 7or di mainta pa 6or di atardi. Trabou nan lo tin un duracion di 1 dia di trabou. Nan ta pidi comprension y cooperacion pa e trabounan cu mester tuma lugar y ta pidi disculpa pa cualkier inconveniencia cu por surgi.