Organisacion di debate pa millenials desapunta di desicion AVP

Organisacion di debate pa millenials desapunta di desicion AVP

Posted on 07/13/2017 12:36 pm AST | Updated on 07/14/2017 1:30 am AST

ORANJESTAD- E organisacion tras di e debate pa Millennials awe mainta a reacciona riba e desicion di partido AVP pa no participa den nan debate. Segun Queen Ann Bergen, pa alredor di 11.30 di ayera nochi a ricibi confirmacion oficial for di partido na mando, AVP, cu nan no lo ta participando mas den e debate di awe nochi. Esaki ta bini no menos cu 20 ora prome cu e debate lo mester tuma lugar. E organisacion ta respeta e decision di e partido pa retira for di e debate, pero si ta hopi desapunta den e forma y tempo cu a opta pa comunica esaki.

Manera por a nota den medionan di comunicacion, e partido a saca varios declaracion tocante nan participacion pero nunca a expresa esaki cu e organisacion directamente. E organisacion a haci su maximo esfuerso pa asina haya un confirmacion oficial di e partido pero no a ricibi un contesta, esaki despues di haci varios yamada y manda mensahe via Whatsapp pero tabata envano.

Comunicacion tabata duidelijk for di comienso cu e invitacion tabata pa lider di partidonan participa den e debate, como nan ta esun cu ta carga e vision y tin e contenido di e plan di nan partido pa Aruba. Ademas, ta e lider ta responsabel pa ehecuta e plan di accion presenta y cu lo wordo vota riba dje. Aunke varios partido a pidi si nan por manda un otro candidato cu no ta e lider di nan partido, e organisacion a para firme riba e regla cu ta lider di partido so lo por participa na e debate mirando e informacion y contenido cu nos ta desea pa trece dilanti den e debate. Na ningun momento e organisacion a indica cu Sra. Gerlien Croes no ta capacita pa representa su partido of no ta bonbini pa presencia e debate. For di comienso organisacion a ricibi confirmacion cu Prome Minister, lider di partido AVP, Sr. Eman lo ta participando den e debate politico constructivo organisa pa Millennials.

E meta di e organisacion tras di e debate pa Millennial ta pa crea un plataforma unda e voz di e "Millennial voter" ta wordo treci dilanti cerca potencialmente nos futuro lidernan. E grupo di hoben tras di e debate aki a traha duro pa brinda tur lider di partido un oportunidad husto pa elabora riba nan vision y plan pa nos dushi Aruba y demonstra un caracter fuerte cu nos hobennan por admira. E organisacion ta tuma e debate aki sumamente na serio y a percura cu tur comunicacion ta pasa den un forma profesional y ta desapunta cu esaki no ta nivel cu a ricibi back for di partido AVP.

Segun Bergen, ta di lamenta cu e partido na mando a opta pa no honra su acuerdo haci cu e organisacion di e debate pa Millennials, unda a bai di acuerdo pa manda e lider di partido na e debate. Alabes, por a lesa riba rednan social con e lider di partido, cu por cierto ta Minister President di Aruba actual, ta cuestiona e agenda y integridad di e organisacion. Un organisacion cu ta consisti di un grupo di hoben dinamico y boluntario cu diferente ideologia y area di experticio, los di tur partido politico pero cu un solo meta: pa trece informacion imparcial y cla na nos hobennan los di evento/ fiestanan politico manera ta custumber. Alabes, stimula nos hobennan y pueblo en general pa ta mas critico y conciente ora nan drenta e urna electoral dia 22 di september binidero.

Nan ta gradici tur partido cu si a acepta y honra e reglanan stipula door di e organisacion tras di e debate pa Millennials y alabes sostene e organisacion den su desicion. E invitacion ta keda habri pa lider di partido AVP participa na e debate awe nochi. Nos ta desea tur participante hopi exito awe nochi y sigur ta conta riba un debate riba nivel halto.

  • Tisa LaSorte ta bira CEO y Presidente nobo di AHATA

    Tisa LaSorte ta bira CEO y Presidente nobo di AHATA

    ORANJESTAD - E hunta di Directornan di Aruba Hotel and Tourism Association (AHATA) ta anuncia nombracion di Tisa LaSorte como CEO y Presidente di AHATA, entrante dia 18 di juni 2018. Asina un comunicado di e asosacion hotelero a divulga diadomingo atardi. Actualmente Tisa LaSorte ta emplea na Bucuti & Tara Beach Resort como un miembro di nan ekipo di gerencia.

  • Intervencion di Radiologia awo modernisa den compleho nobo

    Intervencion di Radiologia awo modernisa den compleho nobo

    ORANJESTAD - E compleho nobo cu a caba di habri na Hospital ta conta cu dos camber pa haci intervencionnan di cual un di nan ta destina pa intervencion di radiologia. Intervencion di radiologia tabata existi caba na Hospital pero cu e tecnologia sofistica y un camber ful renoba aworaki por brinda mas servicio ainda. E avance aki ta trece cu ne mas opcion cu antes no tabata posibel na Aruba.

  • Abogado: Gobierno no kier paga compania pa trabou di Caya Grandi

    Abogado: Gobierno no kier paga compania pa trabou di Caya Grandi

    ORANJESTAD – Gobierno no kier paga e compania constructor responsabel pa e ‘renobacion’ di Caya Grandi, esta e compania Mantbraca. Asina abogado pa e compania Zuhaila Arends Marchena a confirma e siman aki pa NoticiaCla. “E position di Land Aruba ta cu Mantbraca no a caba e proyecto na tempo y e boetnan a acomula dus cu (gobierno ta haya cu) no mester paga” Arends a bisa. Esey a conduci cu a hiba gobierno corte.

  • Aruba tin un provedor nobo di sapato ortopedico

    Aruba tin un provedor nobo di sapato ortopedico

    (ADVERTORIAL)

  • Meteo: Alerta pa biento duro y laman bruto awe merdia

    Meteo: Alerta pa biento duro y laman bruto awe merdia

    ORANJESTAD - Un alerta pa biento duro i lama localmente bruto lo drenta na vigor awe merdia 12’ or i lo keda valido te diasabra 6 pm 21 April 2017. E ta afecta full Aruba.

  • Trahadornan di Parke Arikok un biaha mas a bay den accion

    Trahadornan di Parke Arikok un biaha mas a bay den accion

    ORANJESTAD – Trahadornan di Parke Arikok diaranson mainta a bolbe pone trabou abou pa e malcontento cu tin. Nan a informa nan malcontento na e minister di medio ambiente Otmar Oduber cu ta responsabel pa e parke awe mainta, cu tabata presente tambe. Entre e problemanan, ta e falta di comunicacion, tambe e hecho cu directiva a cambia statuut di e fundacion den un forma unilateral. Despues e hefe di park rangers a mustra cu ta manda un carta pa directiva y si no tin resultado positivo, lo intensifica e accionnan aki. E mandatario un biaha mas na e sitio a mustra cu e no ta contento cu e actitud

  • Powered by SETAR