Organisacion di debate pa millenials desapunta di desicion AVP

ORANJESTAD- E organisacion tras di e debate pa Millennials awe mainta a reacciona riba e desicion di partido AVP pa no participa den nan debate. Segun Queen Ann Bergen, pa alredor di 11.30 di ayera nochi a ricibi confirmacion oficial for di partido na mando, AVP, cu nan no lo ta participando mas den e debate di awe nochi. Esaki ta bini no menos cu 20 ora prome cu e debate lo mester tuma lugar. E organisacion ta respeta e decision di e partido pa retira for di e debate, pero si ta hopi desapunta den e forma y tempo cu a opta pa comunica esaki.

Manera por a nota den medionan di comunicacion, e partido a saca varios declaracion tocante nan participacion pero nunca a expresa esaki cu e organisacion directamente. E organisacion a haci su maximo esfuerso pa asina haya un confirmacion oficial di e partido pero no a ricibi un contesta, esaki despues di haci varios yamada y manda mensahe via Whatsapp pero tabata envano.

Comunicacion tabata duidelijk for di comienso cu e invitacion tabata pa lider di partidonan participa den e debate, como nan ta esun cu ta carga e vision y tin e contenido di e plan di nan partido pa Aruba. Ademas, ta e lider ta responsabel pa ehecuta e plan di accion presenta y cu lo wordo vota riba dje. Aunke varios partido a pidi si nan por manda un otro candidato cu no ta e lider di nan partido, e organisacion a para firme riba e regla cu ta lider di partido so lo por participa na e debate mirando e informacion y contenido cu nos ta desea pa trece dilanti den e debate. Na ningun momento e organisacion a indica cu Sra. Gerlien Croes no ta capacita pa representa su partido of no ta bonbini pa presencia e debate. For di comienso organisacion a ricibi confirmacion cu Prome Minister, lider di partido AVP, Sr. Eman lo ta participando den e debate politico constructivo organisa pa Millennials.

E meta di e organisacion tras di e debate pa Millennial ta pa crea un plataforma unda e voz di e "Millennial voter" ta wordo treci dilanti cerca potencialmente nos futuro lidernan. E grupo di hoben tras di e debate aki a traha duro pa brinda tur lider di partido un oportunidad husto pa elabora riba nan vision y plan pa nos dushi Aruba y demonstra un caracter fuerte cu nos hobennan por admira. E organisacion ta tuma e debate aki sumamente na serio y a percura cu tur comunicacion ta pasa den un forma profesional y ta desapunta cu esaki no ta nivel cu a ricibi back for di partido AVP.

Segun Bergen, ta di lamenta cu e partido na mando a opta pa no honra su acuerdo haci cu e organisacion di e debate pa Millennials, unda a bai di acuerdo pa manda e lider di partido na e debate. Alabes, por a lesa riba rednan social con e lider di partido, cu por cierto ta Minister President di Aruba actual, ta cuestiona e agenda y integridad di e organisacion. Un organisacion cu ta consisti di un grupo di hoben dinamico y boluntario cu diferente ideologia y area di experticio, los di tur partido politico pero cu un solo meta: pa trece informacion imparcial y cla na nos hobennan los di evento/ fiestanan politico manera ta custumber. Alabes, stimula nos hobennan y pueblo en general pa ta mas critico y conciente ora nan drenta e urna electoral dia 22 di september binidero.

Nan ta gradici tur partido cu si a acepta y honra e reglanan stipula door di e organisacion tras di e debate pa Millennials y alabes sostene e organisacion den su desicion. E invitacion ta keda habri pa lider di partido AVP participa na e debate awe nochi. Nos ta desea tur participante hopi exito awe nochi y sigur ta conta riba un debate riba nivel halto.