Caribbean Journal: Aruba destinacion #1 pa pasa vacacion cu famia

ORANJESTAD - E siman aki, e editorial di Caribbean Journal a conclui cu Aruba ta e destinacion numero 1 den Caribe pa esnan cu kier biaha cu famia. Esaki ta a base di varios factor, incluyendo aeropuerto, infrastructura di transportacion, calidad di buelo nan pa e destinacion, facilidad di nabegacion riba e isla, variedad di atraccionnan, playanan y beyesanan natural. Ademas e proporcion y calidad di nos hotelnan cu facilidadnan pa por acomoda un famia a wordo evalua.

Categorisando Aruba como e ‘capital di turismo di e islanan den Reino Hulandes’, Caribbean Journal ta conclui cu Aruba a sa di mantene y crea locual ta un di e destinacionnan mas amabel den region Caribense. Tambe Aruba ta destaca den infrastructura di transporte y un gran variedad di buelonan directo di su mercadonan principal Merca y Latino America.

Segun Caribbean Journal, tin varios opcion den region Caribe, pero ta algun isla tin e elemento unico familiar y amabel, cu ta agrega na e nivel di comfortabilidad y seguridad, haciendo di e destinacion di Aruba uno ideal pa un famia cu ta biaha hunto y como tal brindando un estadia di calidad y ‘family-friendly’. Den e cuadro aki Aruba a sa di destaca entre tur otro destinacion Caribense. Durante e prome 6 lunanan di aña 2017, 48% di e total di nos bishitantenan ta ‘repeat visitors’, bishitantenan fiel cu stima Aruba como un destinacion familiar y amabel pa pasa nan vacacion trankil. Foto cortesia Caribbean Journal.