ATA cu plan pa nos destinacion ‘Cu mira pa futuro’

ORANJESTAD– E siman aki, e plan ‘Cu Mira pa Futuro’ a wordo presenta oficialmente na tur socio como tambe publico general cu a forma parti di e proceso pa formula un plan pragmatico pa cu un desaroyo balansa di e producto turistico di Aruba. 90 accion concreto a wordo delinea den e plan ‘Cu Mira pa Futuro’, variando di accionnan pa stimula innovacion como tambe accionnan pa duna atencion debido na proteccion di nos cultura, naturalesa y medio ambiente. A.T.A. lo continua na traha cu esnan concerni enfocando riba desaroyo den bienestar di nos pais.”

Durante un periodo di 10 luna, A.T.A. conhuntamente cu mas di 350 socio cu ta forma parti di departamentonan gubernamental, sector priva, NGO’s, studiantenan y e pueblo di Aruba en general a delinea accionnan segun categoria, importancia, tempo cu lo tuma pa implementa, y esnan cu mester lidera ehecucion di entre otro e accionnan. E plan ta consisti di 5 obhetivo strategico y 22 punto di prioridad cu a resulta den 90+ punto di accion concreto. Pa cada punto di e prioridad a wordo identifica accionnan concreto cu lo wordo implementa den e proximo 4 pa 5 aña. A opta pa un proceso participatorio, “bottom up”, pa asina tur elemento di e destinacion por wordo revisa di un manera transparente y interactivo. Hunto cu socionan a logra alinea e diferente accionnan cu ta rekeri atencion di varios departamento gubernamental y organisacionnan priva, como tambe NGO’s, pa asina sigura cu tur elementonan cu ta toca desaroyo di e producto turistico en general ta riba e mesun liña cua vision y pasonan cu mester wordo tuma den e proximo 4 pa 5 aña. E plan strategico, pero pragmatico, cu ta conta cu e sosten di socionan, ta di sumo importancia pa asina por alinea y determina e siguiente pasonan pa haci di Aruba uno mas dushi pa biba, como tal uno dushi pa bishita.

Aruba Tourism Authority ta invita y encurasha un y tur pa “download” e plan aki y pa ta informa di e contenido y pa sigur haci uzo di dje pa decisionnan actual y di futuro. E plan ta obtenibel riba www.Cumirapafuturo.com of por sigui nos tambe riba Facebook @CuMiraPaFuturo.