Banco Central ta adverti contra plan di inversion di Questra

ORANJESTAD – Banco Central di Aruba (BCA) ta adverti contra e plan di inversion conoci entre otro como Questra Holdings. Den un aviso den medionan di comunicacion awe, BCA a adverti pues pa tene cuidao cu e instancianan manera Questra Holdings, Questra World y Atlantic Asset Management. E companianan aki ta ofrece servicio di inversion na Aruba via medionan social. NoticiaCla sa cu tin varios hende na Aruba cu ta acercando hende pa esaki tambe. Pero e operacion aki no tin aprobacion di BCA y como tal no por opera legalmente.

CONSEHO DI BANCO CENTRAL E pensamento di BCA ta cu no por tin un rendimento halto sin tin un riesgo halto. “Alega lo contrario por ta un indicacion di fraude y consecuentemente lo mester tuma maximo cautela” e aviso ta sigui bisa. Como tal BCA ta conseha publico no responde na e servicio di esnan liga cu e companianan aki. Tambe a pidi pa no transferi placa pa cualkier cuenta bancario cu nan por a menciona. Segun BCA, e companianan menciona, ya caba tabata suheto na diferente advertencianan di diferente autoridad di supervision den exterior. Ta haci mencion di entre otro Financial Conduct Authority, autoridadnan di Belgica y mas.