Millennial organisation no a haya notificacion oficial di retiro di AVP di debate

ORANJESTAD - Na e momento aki, e organisacion di e "Millennial debate" no a ricibi ningun confirmacion oficial for di e partido riba e decision pa no forma parti na e debate. E grupo lo keda pendiente pa un notificacion oficial di e partido AVP su decision den nan participacion na e debate constructivo "Millennial edition" mayan anochi. Asina e organisacion a reacciona pa NoticiaCla awe mainta riba e noticia di ayera nochi cu partido AVP a retira nan participacion. Den un comunicado, e grupo tras di e debate constructivo "Millennial edition" a bisa di a bin tuma nota riba e noticia cu a wordo publica riba rednan social cu e partido politico, AVP, a opta pa retira na ultimo momento di e debate di diahuebs awor. “ Esaki a bin despues di tabata den contacto estrecho cu e partido, manera ta e caso cu tur otro partido”.

CONFIRMA FOR DI COMIENSO CABA

Segun e grupo, ta for di comienso a informa tur partido riba e formato, reglanan y meta di e debate aki. Manera ta conoci, e debate pa Millennials a wordo forma cu e meta pa informa pueblo di Aruba, muy en especial e grupo conoci como "Millennials", di nan plan y vision di cada partido participando den e eleccion venidero. E grupo a opta pa invita e lidernan di cada partido pa asina brinda nan e oportunidad pa comparti e plan y contenido di nan partido riba diferente topico cu ta di importancia pa e votador "Millennial". “Sigur ta di elogia e participacion di "Millennials" den e tereno politico pero mester remarca cu e objetivo di e debate ta pa e informacion wordo presenta door di e lidernan di e partido nan politico” e grupo ta finalisa bisando.

NOTIFICACION DI AVP

Manera ta conoci, diamars anochi e portal aki a presenta e noticia cu partido AVP a dicidi cu nan no ta participa na e debate di diahuebs proximo. E portal aki a haya confirma di personanan den e organisacion berde. Motibo ta cu e organisacion di e debate di millennials no ta dispuesto pa tuma Gerlien Croes como e candidato pa representa e partido diahuebs awor. E partido mientrastanto a yama un conferencia di prensa pa diaranson mainta na Cas di Partido unda cu lider di partido Mike Eman y candidato Gerlien Croes lo ta presente. No a logra haya contacto cu e organisacion di e debate pa wak nan punto di bista riba e tema. E debate ta programa pa tuma lugar diahuebs anochi awor. Ta conoci cu e organisacion a laga sa cu tur lider a confirma nan participacion. Pero awor ta parce cu partido AVP no kier a manda nan lider mas sino Gerlien Croes pensando cu e ta representa e grupo di millenials cu por vota. Inicialmente a programa un conferencia di prensa pa awe mainta 11’or pero a pospone esaki pa mayan 10’or. No a duna motibo pa e posponemento. Foto ta di archivo di NoticiaCla di e conferencia di prensa di e grupo di debate, anunciando e evento recientemente.