Pa sindicatonan (publico) dialogo social a perde su esencia

ORANJESTAD - Pa sindicatonan trahadonan publico, dialogo social a perde su esencia. Segun e sindicatonan SEPPA, SADA, SPA y SIMAR, esaki ta desde cu gobierno a hisa e aumento di edad di penshun di biehez na December 2013. “ Akinan, aunke e posicionnan tabata diverso, tabata falta hopi claridad prome cu un decision por a cay.” Toch na final gobierno a bai cu su idea, su posicion y presenta esaki na Parlamento. Un di nan coleganan syndical, esta SEPPA ya lunanan atras a informa Gobierno di no ta sigui den reunionnan di dialogo social.

Lastimamente, nan a constata den e discusionnan tocante aumento di edad di biehez cu e pensamento di traha duro pa yega mas serca di otro riba un posicion no a conta, loke a conta ta cu por a bai na Parlamento cu e storia cu a discuti den dialogo social. Pero segun e sindicatonan, no a mustra e pakico sindicatonan tabatin tanto obhecion. Y e ora si no a corda riba e factor di yega mas serca di otro, pero a pasa over pa sin mas bai hisa edad di penshun di biehez, segun e bloke sindical. Pa nan, aki e esencia, e fundeshi di dialogo social a cai den otro. Segun e sindicatonan, awor ta invita tur gremio pa bin sinta den dialogo social. Anto den e instancia aki, a bagateliza e instrumento di “dialoga” na unda ta pasa over pa “informa” solamente.

 Esnan cu a bai e encuentro di dialogo social a bin tende cu e asunto di hisamento di prijs di coriente ta un decision y cla. “Nada di purba yega mas cerca di otro su posicion, opinion di otro partnernan no ta conta, pero just un style di biba cune!! Otro prueba mas cu Dialogo social ya no ta existi!!” e gremionan sindical a laga sa. “Sin duda algun nos ta mirando e mal intencionnan pa cu empleadonan publico, contra servicionan publico y cu esaki gobierno como e dunador di trabao mas grandi na Aruba ta pasa over pa confrontacionnan, e otro extremo di dialoga” e grupo di 4 sindicato a finalisa bisando.