Sindicatonan sector publico contra aumento prijs di coriente

ORANJESTAD - Sindicatonan sector publico contra e medida pa hisa prijs di coriente. SADA, SIMAR y SPA si a bai scucha pa wak kico ta bin padilanti recientemente, ya cu scucha y busca informacion no ta costa nada. SEPPA no a participa na reunion di dialogo riba tema di hisamento di prijs di coriente.   Loke segun e sindicatonan tin, ta cu den e reunion aki a simplemente a bin bisa gremionan e decision ta cla caba, esta cu aumento di prijs di coriente ta tuma .Segun e sindicatonan, tur argumento treci ta keda mustra cu e problema real ta cu no a hasi e mesun ganashi, pueblo ta birando consciente door di no uza coriente mas di lo necesario, prijs aki aya a subi, y tambe entrada ya no ta mescos cu antes. 

E sindicatonan ta sigui mustra cu gobierno y e companianan estatal a bisa di ta zorg pa baha tarifa, a pidi pueblo hasi cambio den su forma di biba, di uza menos coriente, pa bai cumpra inverter (pa comercio keda saca ganashi) cu e pretexto cu asina ta gasta menos, ban “Green” y esnan cu tabata por a hasi tur esakinan.. “ Pero awo na 2014 ta bin di atras cu e golpi y ta hisa prijs di coriente! Aki un par di dia, e anuncio di prijs di awa lo ta su tras. Na final ta dos ruman cu ta tene otro esakinan ta” e gremionan ta sigui bisa. Kiermeen hasi ganashi , maximiliza ganashi cueste loke cueste ta keda pues e filosofia cu ta domina, pero cu na mes momento ta loke ta hinca e trahador, pueblo di Aruba tambe den un situacion social dificil.

E gremionan ta sigui mustra cu hecho ta cu aworakinan nos tin nos dilanti un medida cu na opinion di e gremionan sindical, -y bo ta tende esaki tambe di otro gremionan-, a bin sin un discusion. Tur hende ta pendiente kico ta bai sosode ora e famoso recomendacionnan bin padilanti. “Empleadonan publico, maestronan, polisnan, trahadornan di fundacionnan, etc.. tin cu carga e aumento di prijs di coriente??   Ta parce berdad cu “Loke ta shelo pa e haraña ta fierno pa e musca”” e sindicatonan ta finaliza bisando.