Harbor Arena lo muda di haf pa area di Bushiri

ORANJESTAD – E loke ta conoci awe como ‘Harbor Arena’ pa haci concierto, ta bay di e lugar y ta wordo incorpora den e proyecto nobo di Bushiri Hotel. Asina director di Aruba Ports Authority (APA) Jossy Figaroa a confirma pa NoticiaCla. Mientrastanto lo keda uza e tereno actual conoci pues como e Harbor Arena, pa futuro concierto te ora cu e lugar nobo keda cla unda cu aworaki tin Bushiri Hotel. “Na momento cu cuminsa cu e desaroyo ey, no por organisa (mas concierto riba Harbour Arena)” Figaroa a sigui bisa.

HAF COMO SITIO DI CONCIERTO

For di momento cu a cuminsa ‘remodela e sitio na Surfside den loke e ta awor, a cuminsa uza un parti di e haf, pa tene concierto. Un concepto cu organisadornan di concierto a gusta y a bin ta uza. Hopi a haci e pregunta, con bin por tene concierto riba haf, siendo cu e ta un area hopi protegi, yen di seguridad relaciona cu e.o. bapornan crusero. “Pasobra e parti ey no ta ISPS ( International Ship and Port Facility Security. E ta un areglo di seguridad minimo introduci na 2004 internacionalmente, pa detecta menasa di seguridad y tuma accion preventivo contra incidente cu por afecta bapor, of facilidad portuario.)

E ta tereno di haf, pero e no ta cay bou di e reglanan cu nos ta considera ISPS. E ta completamente kita. Nos a cera e porta y e tereno ey no ta wordo mira como un tereno unda cu e barconan ta para” Figaroa a sigui bisa. E ta tereno di haf, pero e no ta haf