Aruba kier establece buelonan non-stop cu Aerolíneas Argentinas

BUENOS AIRES- Aruba kier establece buelonan non-stop cu Aerolíneas Argentinas. Siman pasa Aruba Tourism Authority como tambe Aruba Airport Authority a bishita Argentina. “Pa 2017, mas di 800 pasahero Argentino ta yega Aruba semanalmente cu buelonan di coneccion. Buelonan semanal non-stop, for di entre otro Buenos Aires, ta como tal sumamente viabel, sigur y rendabel”, CEO di A.T.A. Ronella Tjin Asjoe-Croes, ta remarca tras di su bishita na Buenos Aires. Combersacionnan cu Aerolíneas Argentinas tabata fructifero segun ATA, y a duna inicio na negociacionnan cu por conduci na buelonan non-stop entre e dos paisnan.

E desaroyo positivo di e bishitante Argentino ta danki na aerolineanan latino americano cu rutanan pa Aruba. Aki por mira un dominio significante di e biahero Argentino cu ta 34.3% di tur pasahero di COPA Airlines, 18.8% di Aires/LATAM y 17.7% di Avianca Airlines. Partidonan lo sigui traha riba e posibilidad di buelo non-stop entre Argentina y Aruba.